Një supervjedhje ndodhi shtatorin e kaluar në Greqi, ku një bandë grabitësish të dyshuar shqiptarë arritën të bastisnin valutë dhe ar në vlerën e të paktën mbi 1,5 mln eurove.
Media e vendit fqinj ka publikuar së fundmi edhe pamjet nga kjo grabitje spektakolare, e denjë për filma policorë, teksa aksidenti me pasojë vdekjen e një prej anëtarëve të grupit, shtetas shqiptar, u bë shkak që të zbardhej kjo grabitje e bujshme.
Janë pamjet e kamerave të sigurisë, kur anëtarët e bandës hynë në një shtëpi në Nea Erythraia dhe u larguan “të ngarkuar” me mijëra çantat e mbushura me mijëra euro, shufra ari dhe paund britanikë.
Pamjet tregojnë hyrjen dhe daljen e autorëve.
Ajo që bie në sy është çanta që mban njëri prej tyre. Ndërsa në fillim e mban lirshëm në shpinë, e më pas e mban fort në dorë, me lëkundjen e saj që dëshmon edhe peshën e rëndë nga shufrat e arit.
Vjedhja ka ndodhur në fillim të shtatorit të kaluar, ndërsa në hetimin e çështjes ka luajtur një aksident trafiku me fatalitet i ndodhur në Theologos të Fthiotidës, me viktimë një të ri nga Shqipëria, edhe ky i dyshuar si i përfshirë në grabitje. Aksidenti mendohet se ka ndodhur në tentativë arratisjeje. Dhe kjo pasi autoritetet i gjetën në makinë një çantë shpine me mijëra euro, ndërsa nga telefoni i 35-vjeçarit me origjinë shqiptare, konstatuan se ai ndodhej në zonë ditën e grabitjes.
Në të njëjtën kohë, me heqjen e sekretit telefonik, dolën informacione edhe për tre persona të tjerë për të cilët kishte urdhër arresti, të përfshirë në këtë krim, informon media greke.
Të tre personat u arrestuan më pas në Pire dhe Beoti, ndërsa nga kontrollet u gjetën 87 mijë euro, 7 celularë, një detektor metali, një peshore elektronike precize, si dhe rroba të përdorura në grabitje.
>
