Politika shqiptare ka filluar të dridhet nga reforma në drejtësi. Javët e fundit ky proces po sulmohet ashpër dhe arsyeja duket se është SPAK. Komisioni i vetingut ka përmbyllur procesin për një pjesë të madhe të kandidatëve për në KLGJ e KLP dhe shumë shpejt do ngrihet SPAK me Byronë Kombëtare të Hetimit.
BE e ka vënë kusht që deri në qershor 2019 këto organe jo vetëm duhet të jenë ngritur, por duhet të kenë dërguar para drejtësisë dhe emrat e parë. Sinjalet janë se SPAK dhe BKH mund të zyrtarizohen në fund të vitit, ose në fillim të 2019. Edhe DASH në raportin për asistencën ndaj vendit tonë parashikon që gjatë 2019 këto organe të jenë funksionale.
Por nga do nisë punë SPAK? Kush janë më të rrezikuar prej saj? Sipas ligjit “Për organizimin dhe funksionimin e institucioneve për të luftuar korrupsionin dhe krimin e organizuar” dhe ligjit ‘Për statusin e gjyqtarëve dhe të prokurorëve” me ngritjen e prokurorisë së Posaçme, të gjitha dosjet që momentalisht janë në dorë të Prokurorisë së Krimeve të Rënda do kalojnë aty. Më pas janë çështjet gjyqësore që ka Gjykata e Krimeve të Rënda, të cilat kalojnë te gjykata antikorrupsion.
Nëse shohim situatën aktuale, te këto institucione janë një sërë dosjesh të bujshme, që mund të kalojnë në SPAK. Një dosje mjaft e rëndësishme është ajo e aferës CEZ-DIA. Bëhet fjalë për një padi që juristi Romeo Kara ka bërë në prokurori ndaj presidentit Ilir Meta, ish-kryeministrit Sali Berisha dhe disa ish-funksionarëve të tjerë. Nëse kjo dosje do vijojë të mbetet e hapur, atëherë ajo në fund të vitit me shumë gjasë do kalojë në kompetencë të SPAK.
Një dosje tjetër e rëndësishme është ajo e aferës me rrugën Tiranë-Elbasan. Bëhet fjalë për hetimet që kanë nisur ndaj ish-drejtorit të ARRSH, Dashamir Xhika, i emëruar nga LSI, raporton SOT. Një tjetër emër është Saimir Tahiri. Ish-ministrit ju zgjatën me 3 muaj afatet e hetimeve dhe nuk është çudi që dosja të përfundojë po te SPAK. Së fundmi në Prokurorinë e Krimeve të Rënda ka bërë një padi deputeti Taulant Balla, ndaj kreut të PD, Lulzim Basha, kjo si takon kapjes së 3.4 miliona eurove.
Një tjetër dosje e bujshme është ajo e vëllait të ministrit Fatmir Xhafaj, e cila ende nuk po gjen zgjidhje. Po ashtu Krimet e Rënda po hetojnë dhe rektorin e Universitetit të Tiranës Mynyr Koni dhe dekanin e Fakultetit të Ekonomisë, Dhori Kule.
Dosjet e vetingut
Përveç dosjeve të mësipërme, të cilat nëse nuk mbyllen do kalojnë te SPAK, puna e këtij institucioni do nisë dhe me të ngelurit e vetingut. Gazeta ka mësuar se të gjithë emrat që kanë rezultuar me fshehje pasurie gjatë procesit të rivlerësimit nga KPK do të duhet të përballen me drejtësinë. Kodi i Procedurës Penal detyron KPK dhe ILDKPI që të kallëzojnë penalisht të gjithë emrat që kanë shkelur ligjin dhe kështu do të ndodhë.
Pak muaj më parë KPK kallëzoi Besnik Imerajn, por hetimet ndaj tij u pushuan si nga Prokuroria e Shkallës së Parë, ashtu dhe nga Krimet e Rënda. Për këtë arsye KPK po pret ngritjen e SPAK. Sapo ky organ të jetë gati, me shumë gjasë do të ketë lumë kallëzimesh, pasi shumë gjyqtarë dhe prokurorë kanë shkelur ligjin. Ka shumë nga ata që kanë fshehur të ardhurat dhe kjo gjë dënohet dhe rreziku tani është se gjithçka mund të sekuestrohet.
