Nga Ben Andoni
Pse e tremb UÇK-ja e Hagës, PD-në e Tiranës?! Është më shumë një pyetje retorike për një përgjigje që dihet mirë. Nëse Sali Berisha, lideri i padiskutueshëm i PD-së, do të tregonte se kishte një lloj empatie do ti shprehte sot ngushëllimet Thaçit për vdekjen e të atit, kurse kohë më parë edhe mbështetjen për vajtjen në Hagë. Kuptohet pas tij mungon edhe çdo zë i kthjellët tek PD-ja, sidomos tani në prag të zgjedhjeve. Dhe, kjo dihet dhe kuptohet. Jo vetëm ai, por edhe kryeministri i Kosovës Kurti ka qenë “i rezervuar” për këtë akt civil ngushëllimi që e kërkon kodi zakonor shqiptar. Vdekja është sublime dhe gjithçka fashitet në shenjë nderimi për mortin. Vetëm jo në retorikën e politikanëve shqiptarë.
Aq shumë e kanë shtyrë ofendimin dhe akuzat Berisha ndaj Thaçit saqë e ka problem të kthehet pas. Nëse i pyet zyrtarët tek PD-ja, pse nuk kanë bërë një vizitë për t’u takuar me udhëheqësit e UÇK-së në Hagë, kishte dhe ka vetëm ngritje supesh, sepse askush nuk pipëtin para Sali Berishës që kohë më parë u fut në një debat kinse nacionalist me Thaçin. Për ta justifikuar kontrabandën përmes Shqipërisë drejt ish-Jugosllavisë në kohën e luftës në Bosnjë do t’i atribuonte shumë problematika Thaçit dhe do e mbyllte me etiketimin: “argat të Beogradit!!!” “Ky ka marrë misionin e Serbisë së Madhe. Dosja e Hagës është e tëra e formuluar nga Vukçeviçi, është prokuror i Serbisë. Z.Thaçi ka një dosje të madhe në Hagë dhe ajo dosje është bërë e tëra nga Beogradi”. Kjo erdhi pasi ish-presidenti i Kosovës Hashim Thaçi në një intervistë televizive e quajti “argat të Millosheviçit”.
I gjithë debati është zhvilluar për atë udhë që nisi gjatë kohës së Procesit të Berlinit dhe më pas me “Balkan Open”, ku është folur për ndryshimin e territoreve apo korrigjimin e kufijve Serbi-Kosovë. Dy koncepte të ndara, por që dikur krijoi disakordancë edhe vetë në radhët e zyrtarëve amerikanë. Asokohe i dërguari i Presidentit Donald Trump (mandati i parë) dërgoi në rajon të besuarin e tij Richard Grenell, kurse Departamenti i Shtetit dërgoi Matthew Palmer. Mungesa e një zëri të përbashkët institucional SHBA-Evropë u përcoll me krizën në Kosovë.
Një postim i EUobserver sqaronte se SHBA ka refuzuar të përjashtojë një shkëmbim territori mes Kosovës dhe Serbisë, pavarësisht mosdakordësisë së Gjermanisë për këtë çështje. Richard Grenell vazhdoi ta promovonte idenë e një “marrëveshje të shpejtë” për njohje, sidomos kur po afrohej momenti i mbarimit të mandatit Trump-1. Pak kohë më vonë, po Grenell, kur u kërkua të jepte sqarime për lajmin e ndërrimit apo korrigjimit, do ishte i prerë me median: “Lajm i rremë. Ju asnjëherë nuk keni denjuar që të pyesni. Unë jam për atë çfarë palët pajtohen. Jam i fokusuar në zhvillim ekonomik, jo politikë”. Kurse Matthew Palmer, i dërguari i posaçëm i ShBA-ve për Ballkanin Perëndimor, gjatë një interviste, pasi u pyet për planin e shkëmbimit të territoreve, tha se: “varet nga Serbia dhe Kosova të vendosin parametrat e dialogut” dhe se “qëndrimi i SHBA-së nuk është në kundërshtim me atë të Gjermanisë”.
Veçse Berisha vazhdon me regjistrin e tij dhe po kaq cinik u bë dhe Kurti, kur në një tekst deklamativ i kërkoi Thaçit të shpërngulej me këmbët e veta në Hagë dhe këtë ia përsëriti për 17 herë me radhë në një tekst të hidhur patetik. Pak javë më parë, kur Kurti u pyet pse nuk i viziton njerëzit e UÇK-së, bëri një justifikim të ftohtë, sipas të cilës kërkohej një procedurë tejet e gjatë (Për ironi, kryeministri Rama e mbushi formularin e takimit për pak minuta!) dhe nuk ishte mundur për shkak të detyrave, kurse Berisha hesht, ashtu si po hesht dhe sot bashkë me të gjithë vartësit e tij që Kosovën e përdorin, kur u duhet. Por në Hagë s’është vetëm Thaçi. Është edhe Veseli, Krasniqi dhe Selimi, të cilët mund ta prisnin një vizitë mbështetëse të tyre nga PD-ja e Tiranës. Kjo nuk ndodhi. Nuk ndodh dhe me gjasa nuk do ndodhë. Me sa duket edhe në Hagë, UÇK-ja e tremb PD-në e Tiranës?!
