Ka ndërruar jetë në moshën 57-vjeçare gazetari i sportit, Saimir Demi. Prej kohësh ai vuante nga një sëmundje e rëndë, me të cilën e humbi betejën këtë të Diel.
Demi ka punuar në gazeta të ndryshme sportive në vend, me një karrierë prej 30 vitesh si gazetar sporti.
Presidenti i Federatës Shqiptare të Futbollit, Armand Duka, i ka shprehur ngushëllime familjarëve të të ndjerit.
Nëpërmjet një postimi në profilin e tij, Duka shkruan se Saimir Demi do t’i mungojë jo vetëm familjes së tij, por edhe komunitetit të gazetarëve dhe sportdashësve, ku kontribuoi me përkushtim për tre dekada.
“Me dhimbje të thellë mora lajmin tragjik për ndarjen e parakohshme nga jeta të Saimir Demit, një gazetar i përkushtuar dhe një njeri i jashtëzakonshëm. Me të kemi ndarë biseda, analiza dhe opinione për sportin, veçanërisht për futbollin, një pasion që e udhëhoqi gjithë jetën e tij profesionale.
Një njeri i dashur dhe një profesionist i palodhur, Saimiri do t’i mungojë jo vetëm familjes së tij, por edhe komunitetit të gazetarëve dhe sportdashësve, ku kontribuoi me përkushtim për tre dekada.
Në emrin tim personal dhe në emër të Federatës Shqiptare të Futbollit, i shpreh ngushëllimet më të sinqerta familjes, bashkëshortes dhe djalit të tij, si dhe të gjithë miqve që i qëndruan pranë.
U prehsh në paqe, Saimir! Do të të kujtojmë gjithmonë me respekt dhe dashuri”, shkruan Duka.
