Seanca gjyqësore ndaj Fatmir Mediut për vrasjet në Gërdec, u shty sërish. Kjo, pasi Mediu për të disatën herë nuk u paraqit, duke thënë se ndodhet në Amerikë. Sa herë që Mediu duhet të paraqitet në gjyq, thotë se kanë ftuar në SHBA për takime të rëndësishme.
Edhe këtë herë, Mediu tha nëpërmjet avokatit të vet se kishte një ftesë në Kongresin amerikan nga data 24 mars deri në datën 1 prill.
Prokurori Klodian Braho e quajti të pajustifikuar mungesën e Fatmir Mediut dhe kërkoi të vazhdonte seanca në prani të mbrojtësit të tij ligjor, gjë që u kundërshtua nga ky i fundit. Gjyqtarja Irena Gjoka vendosi të shtyjë seancën duke i tërhequr vëmendjen Mediut, që mungesa të kësaj natyre nuk do të konsiderohen më në seancat e ardhshme.
Në seancë ishte e pranishme edhe Zamira Durda e cila tha që ka 17 vjet që pret drejtësi për djalin e saj të mitur, që ia vranë në Gërdec.
Mbetet për t’u parë nëse Mediun, sa herë duhet të paraqitet në gjyq, e ftojnë vetëm apo me Eli Farën. Fatmir Mediu dhe Eli Fara kanë dhënë një kontribut historik në luftën kundër ngrohjes globale.
Këngëtarja e njohur Eli Fara ka shijuar 56 udhëtime me para publike, me Fatmir Mediun, në Evropë dhe Shtetet e Bashkuara të Amerikës, kur Mediu ishte ministër i Mjedisit në qeverinë e Sali Berishës 2009-2013.
Pasi i shpëtoi ndëshkimit ligjor për Gërdecin në shtator 2009 si ish ministër i Mrojtjes, Mediu u emërua nga Berisha ministër i Mjedisit, gjatë mandatit të dytë qeverisës.
I lehtësuar se i shpëtoi drejtësisë për rolin e tij në tragjedinë me 27 viktima në Gërdec, Mediu riktheu vëmendjen tek Eli Fara, për të cilën sajoi një post në ministri, për ta pasur sa më pranë dhe pse jo për t’i kënduar ndonjë serenatë gjatë ditës.
Mediu e emëroi Elin drejtoreshë për ngrohjen globale, post i cili krijonte mundësi për udhëtime të shpeshta jashtë vendit, në kundër të luftë kundë shkrirjes së akullnajave.
Dhe kështu Mediu dhe Eli Fara nisën rrufeshëm luftën kundër akullnajave, duke shpeshtuar udhëtimet drejt vendeve Evropiane dhe Shtetet e Bashkuara të Amerikës. Betejat kundër akullnajave shpeshherë zhvilloheshin në hotele me 5 yje, në vende ekzotike, si në Maldive, Dubai etj.
Ndoshta i vetmi shqetësim për Mediun ishte ndonjë fantazmë nga Gërdeci.
Vitë më vonë, kur mendoi se punën me drejtësinë për Gërdecin e kishte mbyllur, nisi të merrej për sigurinë e Evropës nga rreziku rus dhe kinez.
Fatmir Mediu përfaqëson prej disa vitesh Shqipërinë si President dhe Drejtor i Bordit Ekzekutiv të Qendrës për Sigurinë e Evropës Juglindore. Drejtor Menaxhimi të Projekteve në Qendrën për Sigurinë e Evropës Juglindore, Fatmir Mediu ka emëruar djalin e tij, Even Mediu prej 3 vitesh, i cili ka marrë në staf edhe mikeshën Ejona Isufi si “Specialiste sigurie”.
As në këtë qendër, Fatmir Mediu nuk punon veresie, por kalon në dorë 1.1 milionë Euro çdo vit; që shteti ia jep nga taksat e shqiptarëve, për të cilat ai dhe i biri, bëjnë letra, sikur i shpenzojnë me projekte të sigurisë për të evituar rrezikun ruso- kinez në Ballkanin Juglindor.
