Kryeministri Edi Rama pritet të prezantojë këtë të enjte, 27 Mars, programin e PS për “Shqipërinë 2030”.
Kryesocialisti e njoftoi këtë një ditë më parë nga Shkodra, ku zhvilloi disa takime, ndërsa iu përgjigj akuzave të opozitës se partia e tij nuk ka një program elektoral.
“Nesër ne kemi shpalosjen e “Shqipërisë 2030” bashkë me të gjithë grupin e deputetëve për t’i dhënë një perspektivë me piketat kryesore natyrisht, sepse ndryshe nga të tjerët që bëjnë programe elektorale ne kemi një program që për çdo fushë kemi një mal me strategji, me plan me të gjitha.
Kështu që është shumë masiv programi ynë, është program qeverisës. Ne qeverisim, ne nuk jemi hajde të kapim ndonjë gjë se s’kemi ndonjë gjë në dorë dhe po i themi do i bëjmë pensionet 500 euro edhe do bëjmë naftën 5 cent. Këto i thotë kush nuk ka gjë në dorë dhe ia fut kot”, u shpreh kryesocialisti nga një takim në Shkodër.
Në krye të fushatës së kreut të qeverisë, është integrimi i vendit në BE. Rama thotë se shqiptarët duhet të mendojnë përtej ndasive politike më 11 Maj, dhe të votojnë në unitet për Partinë Socialiste, pasi siç është shprehur ai, është e vetmja që do të mundësojë hyrjen e vendit në Unionin evropian.
