Besimtarët myslimanë në Shqipëri dhe mbarë botën festojnë ditën e nesërme Fitër Bajramin, një nga festat më të rëndësishme islame, e cila shënon përfundimin e muajit të shenjtë të Ramazanit. Pas 30 ditëve agjërimi, lutjesh dhe reflektimi shpirtëror, kjo festë vjen si një moment gëzimi dhe bashkimi familjar për të gjithë besimtarët.
Në kryeqytetin shqiptar, ceremonia e faljes së Fitër Bajramit do të zhvillohet në Sheshin Skënderbej, ku pritet një pjesëmarrje e madhe e besimtarëve. Sipas burimeve zyrtare, programi do të nisë në orën 06:45 me leximin e Kuranit dhe një ligjëratë fetare, ndërsa falja e namazit do të kryhet në orën 07:30.
Fitër Bajrami, përveçse një ditë feste dhe lutjeje, është gjithashtu një ditë bamirësie. Besimtarët ndajnë sadakanë dhe ndihmojnë ata që janë në nevojë, duke përmbushur një nga parimet kryesore të Islamit – solidaritetin dhe ndihmën ndaj të varfërve. Sipas traditës, familjet myslimane mblidhen për të festuar së bashku, duke ndarë urimet dhe duke shtruar tryeza të pasura me gatime tradicionale.
