Një ndër temat për të cilën po diskutohet gjerë e gjatë përgjatë ditëve të fundit ka qenë kontrata miliona dollareshe e Partisë Demokratike me kompaninë amerikane “Continental” në SHBA, me qëllim lobimin për “non-gratën” e kreut të bluve, Sali Berishës.
Lidhur me këtë çështje është pyetur së fundmi edhe drejtuesja Politike e Partisë Demokratike për Diasporën, Jozefina Topalli. Teksa ka qenë mesditën e kësaj të mërkure në një deklaratë për shtyp, gazetari e ka pyetur Topallin nëse ka qenë në dijeni të kësaj kontrate dhe për burimin e financimit.
Topalli vendosi të përgjigjet shkurt duke thënë se PD ka dhënë një sqarim, duke zbatuar kështu dhe urdhrin e lëshuar nga kryetari Sali Berisha, që të mos bënin deklarata publike apo në media në lidhje me kontratën e lobimit.
Gazetari: Si përfaqësuese e PD-së për Diasporën, a keni dijeni për kontratën e lobimit me kompaninë amerikane, duke qenë se garant për kontratën ka dalë pikërisht një shqiptar i diasporës, Nuredin Seçi, a keni dijeni se nga vijnë këto para, sili është burimi i financimit dhe çfarë është ky fondacion “Make Albania Great Again”.
Jozefina Topalli: Detyra ime ka qenë krejt tjetër, ndërkohë që Partia Demokratike e ka sqaruar këtë çështje.
Një sqarim të gjerë dhe të gjatë Topalli ka pasur për lobimet e PD, kur partia drejtohej nga Lulzim Basha.
“Të deklarohet burimi i të ardhurave për paratë që kanë kaluar në firma lobimi offshore. Nuk ka sqaruar asgjë. Basha ka shtuar konfuzionet dhe paqartësitë për kanalet në të cilat kanë kaluar paratë. PD nuk mund të mbajë kosto tjetër dhe akuza kur flasin për para në offshore. Një gjë është themelore, ai duhet të sqarojë, ai ia ka borxh PD-së të sarojë. Ai ka lëvizur para, në atë kohë që kam qenë në grup parlamentar. Por në kryesinë e PD nuk ka pasur vendim për këtë gjë. Vendimet për lëvizjen e parave nuk janë marrë si vendime të forumeve të Partisë Demokratike. Janë vendime private të z.Basha. Ndryshe i paraqet shifrat në deklaratë dhe ndryshe thotë Lulzim Basha, për para që nuk ua dimë burimin, nuk ua dimë kanalet”, thoshte Topalli.
Pra për lobimin me 500 mijë USD nga Basha, Topalli ka qenë shumë e shqetësuar pasi po dëmtohej PD-ja, ndërsa për lobimin 6 milionë USD nga Berisha nuk ka komente dhe nuk është e shqetësuar, pasi është fokusuar te Diaspora.
Jozofina Topalli është skeduar si koka e mafies së pronave në Shkodër. Pronat e saj, në emrin e familjarëve dhe njerëzve të besuar, shtrihen nga Razma, në qytetin e Shkodrës, Velipojë, Tiranë, Mullet etj., me dokumente false dhe ndikime të paligjshme, kryesisht gjatë pushtetit të dytë të Berishës, ku Topalli ishte kryetare Kuvendi. Letrat e pronave të tjetërsuara kanë kaluar nga zyra e noterisë së bashkëshortit Ndoc Topalli.
Kur disa banorë të Shkodrës denoncuan shtetasin Nikolin Kujgjia si prestanome e Jozefina Topallit në grabitjen e pronave me letra false në Shkodër, Topalli kërcënoi gazetarin që raportoi lajmin.
Topalli krijoi një parti në prag të zgjedhjeve të 2021 për inat të Lulzim Bashës, me qëllim dëmtimin e PD-së, pasi Basha nuk e futi në listën e 2017. Partia ishte një dështim. Nuk arriti të dëmtonte PD në asnjë qark. Në Tiranë Topalli mori 458 vota personale. Topalli kandidoi në 4 qarqe. Rezulatin më të lartë e mori në Shkodër, më pak se 600 vota. Votat e partisë së Topallit në rang kombëtar nuk prodhonin dot asnjë një mandat të vetëm.
Topalli përfitoi nga grindja mes Berishës dhe Bashës në shtator 2021, duke hyrë edhe një herë në skenën politike. Kur Basha tentoi të pavarësohej nga Familja Berisha, Berisha e përzuri nga partia, duke i marrë vulën, partinë dhe selinë. Berisha mblodhi të pakënaqurit e Bashës, disa nga të cilët i futi në listë të mbyllur. Meqenëse me votat e saj personale tregoi se mund të siguronte 1/20 të votave të domosdoshme për të prodhuar mandat, Berisha e futi Topallin në listën e mbyllur në Tiranë, duke i dhënë mandatin në kurriz të atyre që u votuan në primare si Jorida Tabaku, Grigels Muçollari etj.
.
