Arben Nela, prokuror pranë Prokurorisë së Rrethit Gjyqësor Tiranë u përball sot me Komisionin e Pavarur të Kualifikimit.
Trupa gjykuese përbëhet nga Etleda Çiftja, Xhensila Pine, Valbona Sanxhaktari. Nela është kandidat për Këshillin e Lartë të Prokurorisë çfarë e bën pjesë të listës prioritare.
Në seancë, KPK ka lexuar raportin për prokurorin Nela. Sipas ILDKPI Arben Nela nuk ka bërë deklarim të saktë dhe po kështu s’ka burime të mjaftueshme financiare. Raporti thotë se prokurori Nela ka bërë fshehje të pasurisë.
Sipas raportit prokurori Nela ka një apartament 99.4 m2, blerë në vitin 2011 për 41 mijë euro, në bashkëpronësi me gruan. Sipas deklarimit apartamentin e ka blerë me kursimet në vite nga puna që prej 1998 dhe kursimet e gruas e cila punon në ministri të Transporteve dhe profesoreshë.
Për blerjen e kësaj shtëpie prokurori ka deklaruar se ka marrë borxh prej 25 mijë eurosh dhe nga motra e gruas. Sipas KPK-së, për këtë apartament ka mospërputhje në deklarimet e pasurisë në vite. Ndërsa për borxhin e marrë nga kunata është e paqartë se kur ia ka marrë dhe kur ia ka kthyer.
Vetë prokurori Arben Nela ka mohuar se ka fshehur pasurinë, para trupës gjykuese të KPK-së. “Nuk kam fshehur pasuri, nuk i keni llogaritur siç duhet. Nuk ekziston asnjë fakt që unë kam fshehur pasuri, raporti sjell fakte të shtrembëruara qëllimisht. ILDKPI ka interpretuar qëllimisht pasuritë e mia me keqdashje”, deklaroi Nela.
