Flamur Noka ishte sot në Log, News 24 për të folur mbi atë çka pritet të bëjë opozita në aksionin e ri të shpallur prej saj për mbrojtjen e votës, pas zgjedhjeve të humbura të 11 majit.
Noka ka folur fiks si tek “Antena brenda Familjes”, e cila ishte botuar dy orë më parë, duke thënë se PS nxinte e steronte sot në Kuvend, ndryshe nga PD.
Flamur Noka: Një farsë e paralajmëruar. Me anë të rezolutave të PPE dhe më gjerë. Të organizatave kryesore botërore të qendrës së djathtë. Ku theksohet shteti elektoral, presioni, patronazhimi i votës, ku theksohet që Shqipëria është narko-regjim. Nuk ka zgjedhje. Ju e patë edhe sot. Ata dukeshin sikur s’kishin fituar. Ishin në një heshtje mortore. Ishin sikur i kishte rënë mortja.
Ju doli situata jashtë kontrollit. U bë një batërdi. U njësuan shteti me partinë e pushtetit. Për herë parë në 30 vjet, krimi përqendroi votën. Në një shtet demokratik opozita e ka përballjen me forcën e pushtetit.
Në një sistem demokratik kush është garanti i rregullave zgjedhore, i votës së lirë? Shteti. A kishte një garant të tillë? Jo. PD dhe aleatët bën betejë me partinë e pushtetit, me shtetin të kthyer në shtet elektoral. Çdo punonjës i administratës ishin shndërruar në një militant partie, që kishte detyrë jo vetëm të votonte, por edhe të çonte 20 vota. Për regjimin.
Ne pamë policia, si kurrë ndonjëherë, në shërbim të partisë për të ,mbledhur vota, me patronazhim edhe policët. Sipas informacioneve, edhe SHISH, dy nëndrejtorët angazhuan rrjetin e bashkëpunëtorëve të shërbimit me detyrë patronazhimin. Ku është kjo? A janë zgjedhje këto? A ndodh në ndonjë vend tjetër të NATO, BE? A ndodh kjo skemë kriminale në ndonjë vend të NATO? Vota është e shenjtë.
Ne jemi me mision, misionarë të votës së lirë. Mision i shenjtë për çdo njeri që ndjen se ka detyrime për këtë vend. Ju them sot, se 11 maji tregoi se jemi në diktaturë të re më të egër se diktatura ideologjike.
Humori i Antenës brënda familjes:
Pas seancës së sotme të Parlamentit, ku Muli shkëlqeu me agresivitetin e tij, shkoi të pinte kafe me Lelon.
– Sot ishim superiorë, i tha Muli.
Për herë të parë i vumë përpara keq dhe ishim fitues.
– Si ishit fitues, pyeti Lelo?
– Ishim fitues të plotë.
Tek ata kishte rënë zia, ndërsa tek ne ishin të gjithë të motivuar.
– Po pse, çfarë ka ndodhur?
Janë anuluar zgjedhjet, e pyeti Lelo?
– Jo, përkundrazi, tha Muli.
Po të ishin anuluar zgjedhjet, do ishin ata të gëzuar.
– Po pse, tha Lelo? Ata kanë fituar.
– Nuk kupton gjë fare, ia ktheu Muli.
Po grupi ynë është kompakt, dhe siç është në këtë parlament, do jetë edhe në parlamentin tjetër.
Nuk na mungon asnjë.
Kurse ata, as gjysma e atyre që ishin sot, nuk do jenë më në Kuvend.
Dhe u kishte rënë zia.
Na shikonin gjithë zili që do ishim prapë deputetë.
Rezultati ynë ndaj tyre ishte 60 me 40, nëse do llogarisnim sa nga ne do jenë sërish, e sa nga ata do dalin jashtë.
– Qenka lajm i mirë, tha Lelo.
Domethënë jemi fitues në një pikë të paktën.
– Po, po. Sot i shkatërruam.
Deri në korrik do t’i vëmë përpara, se s’kanë pikë motivimi për t’u mbrojtur.
Pastaj në shtator nis revolucioni me ata të rinjtë që do vijnë.
