Gazetari Mero Baze, i ftuar në emisionin “Të Paekspozuarit” në MCN TV, ka bërë disa deklarata të forta në lidhje me SPAK dhe reformën në drejtësi.
Baze tha se SPAK ka treguar praktika linçuese ndaj disa politikanëve, duke i mbajtur të izoluar në paraburgim, pa arsye, ndërkohë që nuk ka krijuar asnjë lloj standardi të unifikuar në hetimin e korrupsionit. Sipas Bazes, nuk ka arsye që Meta dhe Veliaj të qëndrojnë në paraburgim, kur nuk paraqesin ndonjë rrezikshmëri për hetimin dhe mund të hetohen në gjendje të lirë.
Baze shtoi se SPAK dezinformon qëllimisht, “për të mbuluar paaftësinë e prokurorëve”.
“Në aspektin pozitiv, për herë të parë ne kemi një institucion, që në mënyrë të qartë ka distancë nga politika shqiptare, nga opozita dhe nga pushteti dhe nuk ka drojë të godasë ku dëshiron, edhe për shkak të mbështetjes së fortë ndërkombëtare që ka patur edhe për shkak të mbështetjes formale që ka patur nga politika, SPAK për herë të parë në historinë e Shqipërisë është një institucion i cili i ka rënë me shkelm çdo dere që i ka dalë përpara, nuk ka patur hezitm, ka shkuar në nivelet më të larta nga të dyja krahët. Kjo është jo falë meritës së SPAK, por falë pushtetit që i është dhënë SPAK nga mbështetja ndërkombëtare dhe politika shqiptare. Mendoj se ky është edhe fenomeni më i rëndësishëm që ka ndodhur në reformën në drejtësi.
Përtej kësaj, ne pastaj kemi një bilanc jo edhe aq të lavdishëm të SPAK në hetimin e korrupsionit, për shkak se nga një fushatë për drejtësi që është nisur, ka përfunduar në një fushatë ndëshkimore, shpeshherë edhe e llogaritur me balancime politike, e cila ka dëmtuar në njëfarë mënyre standardet e hetimit të korrupsionit në Shqipëri, të vendosjes së korrupsionit përpara shtetit ligjor.
E para, meqenëse SPAK është prokurori speciale, detyra themelorë ka qenë të krijonte një standard shumë të qartë për luftën kundër korrupsionit, standard, që do të vlente për çdo njeri dhe të krijonte praktika unifikuese për hetimin. Ajo që ka bërë SPAK sot, është një larmishmëri e pafundme për standardet që ka vendosur për hetimin. Ne kemi, kryetar bashkish të marrë nën hetim, sepse kanë hequr drejtor ujësjellësi. Kemi kryetar bashkish të paraburgosur dhe të futur në burg, me një vit e gjysmë dënuar, sepse u ka dhënë eskavatorin fshatarëve të bëjnë rrugë në pyll, kryetar bashkie të marrë nën hetim dhe akuzuar me një vit burg, se ka marrë taksa një karburanti që ka patur probleme me leje, që nuk është punë fare e tij, kemi kryetar bashkie të kryeqytetit që është marrë në paraburgim, nën dyshimet se gruaja e tij, në një aktivitet bamirës, është financuar nga disa biznesmenë që kanë marrë leje në bashkinë e Tiranës. Për këtë kryetari i bashkisë, arrestohet paraprakisht, pa patur asnjë lidhje shkak-pasojë.
Nga ana tjetër, SPAK ka bërë operacione, nën emrin e luftës kundër korrupionit, ka krijuar arbitraritet në arrestimin e njerëzve me profil të ulët politik që përfshihen në korrupsion, përshembull, rasti i policëve të Kukësit, 20 policë, që u arrestuan për pesë euro dhe ndejtën 7-8 muaj, një vit në burg dhe nuk i merrte me njeri në pyetje, të rrasin aty brenda, e kanë bërë burgun në Shqipëri një fenomen, që mund të jemi vendi me koefiçentin më të lartë të paraburgimit në botë, pavarësisht shifrave të drunjta që jep SPAK. Mendoj se SPAK ka dëmtuar rëndë standardet e hetimit dhe praktikat që e unifikojnë atë. Nuk kemi asnjë standard tani, që të themi se standardi që ka vendosur për të dënuar kryetarin e Bashkisë së Fushë Arrëzit, duhet të dënosh pastaj të gjithë kryetarët e bashkive të Shqipërisë, sepse të gjithë kanë dhënë një herë eskavatorin për të hapur rrugë në fshat, se nuk vete rruga te shtëpia e njërit. Prokuroria speciale është caktuar për të vendosur standard në këtë vend, jo të dënosh një njeri që në fakt ka bërë një të mirë publike. Drejtësia, nuk është qëllim në vetëvete për të të kapur në defekte administrative. Drejtësia në thelb është përpjekje për të qenë në anën e të drejtës, jo për të qenë, shiko ti shumë mirë e ke bërë, por të kapa te kjo letra, kjo pastaj është linçim, nuk është drejtësi.
E dyta, defekti i dytë, SPAK po kthehet në institucion propagande të frikshme. Zyra e shtypit e SPAK, e cila për fat të keq, keqpërdor edhe një program financimi të qeverisë angleze, është kthyer në një zyrë gëbelsiane, e cila dështimet e prokurorëve, sepse gjysmat e prokurorëve i ka të paaftë, ka ndër prokurorët më të paaftë të Shqipërisë, përjashto Altin Dumanin dhe Krajën, që kanë njëfarë përvoje, ata Dado e këta, as roje prokurorie nuk mund të shkojnë për nga niveli profesional dhe intelektual që kanë, por kjo është çështje e atyre që i kanë zgjedhur. Për të mbuluar defektet e tyre, ne nuk kemi asnjë histori të përfunduar korrupsioni, të hetuar dhe të çuar në gjykatë pas kaq vitesh, përveç rastit të një ministri, Lefter Kokës, që mund të themi se është një proces që e kanë përfunduar, e kanë bërë si e kanë bërë, por e kanë përfunduar. Proceset e tjera, kanë nisur për korrupsion dhe kur nuk gjejnë gjë në korrupsion, vazhdojnë hetime pasurie, familjare, pastaj shkojnë te gruaja, te e dashura, te djali i xhaxhait, arrestojnë njerëzit dhe pastaj gjejnë provat rrugës.
Kemi rastin flagrant të Ilir Metës, e dini mendimin tim negativ për Ilir Metën, por nuk mund ta arrestosh një vit përpara ish Presidentin e Shqipërisë, nën akuza për korrupsion, dyshime, për të cilat ai nuk paraqet asnjë rrezikshmëri që ti të hetosh në gjendje të lirë. Gjithë vëmendja u krijua pse Metën e rrëmbyen me forcë në bulevard. Ajo është çështje e diskutueshme, po qe se do të arrestohej me të drejta, Meta prapë ashtu mund të sillej, të zihej me policët, ajo është incident banal, unë me atë jam më shumë me policët se me Metën, por faktin e urdhër arrestit të Metës, pa patur asgjë në tavolinë, ti e ke arrestuar, ka qenë Presidenti i Shqipërisë, Kryeministër, Kryetar parlamenti, njeriu me më shumë detyra në Shqipëri, pavarësisht i ka merituar apo jo, por e arreston, e fut brenda dhe pas një viti del që paska përdorur Monika një kartë krediti. Për këtë e ke futur një vit brenda? Po pse se fut një vit brenda? Aq ka dalë deri tani. Pse e fut brenda paraprakisht? Ti çoje në gjykatë dhe dënoje 20 vjet po qe se e kap, por një vit e gjysmë para pse e arreston? Kjo është praktikë kriminale, pa asnjë sens njerëzor, sa krijon një lloj bullizimi politik të drejtësisë dhe një standard tmerrësisht frikësues për shoqërinë shqiptare.
Zyra e shtypit e SPAK, të gjithë dështimet e prokurorëve të SPAK, i mbulon me një veprimtari, totalisht jo transparentë në shtyp, përdor një grup fundërrinash, gazetarësh që u sillen vërdallë dhe shpërdajnë lajme të rreme, siç u thonë ata dhe dezinformojnë për çdo proces gjyqësor, duke nxjerrë fakte që nuk janë fakte fare, kur dalin nga dosja. Çfarë nuk kemi dëgjuar ne për dosjen e Ilir Metës, por doli njoftimi i SPAK dhe ka përdorur kartën Monika… Kërkohet edhe shtyrje afati. Po ç’shtyrje afati kërkon ti kur ke një vit qe e ke futur njeriun brenda në burg? Kur doje afat, lije afat, dhjetë vjet vazhdo heto, lëre atë të lirë.
Rasti i paraburgimit të Erion Veliajt, okej, për ta futur në burg dhe për të nxitur një urrejtje popullore, çfarë nuk bënë, shpikën që kjo Ajola ka blerë një million euro brekë, të gjitha gënjeshtra, por nuk po merrem me atë çështje. Ajola Xoxa ka blerë shtatë mijë euro rroba në vit, kaq edhe unë që jam njeriu që vishem më keq në Shqipëri i blej në vit, nuk ka asnjë lidhje. E futën brenda, e arrestuan në atë mënyrë që e arrestuan, mbaroi. Tani vajti njeriu për të apeluar, vajtën në apel, dhe ngritën një furtunë të tërë, që kemi përgjime të Erion Velisë, nga qelia dhe me këto përgjime ai nuk duhet të dalë më nga burgu, çelsat ne det, përmendën emrin tim dhe u çudita, sepse unë nuk kisha folur me Erion Velinë nga telefoni. Kur doli, doli që ky kishte folur me gruan dhe vëllanë dhe pyeste, çfarë ka gazeta Tema, çfarë ka gazeta filan, po çfarë, nuk do të pyesë ai në burg? Nuk ka të drejtë të mbrohet ai në burg, pasi e fut në burg?
Gjithë kjo zyra gëbelsiane e shtypit, që komandohet nga Olsi Dado dhe Altin Dumani në këtë rast, shpiknin gjëra që kur i nxorrën ishte për turpin e tyre. Kur u ankimua vendimi, u ankimua për shkak të akuzës që i ngritën në shkallën e parë dhe ti kur vete në apel, do të përgjigjesh për akuzën e parë. Nëse Vëliaj kishte bërë masakër në burg siç thoshin, ai është një dënim i ri që mund ti shtohej por nuk mund të gjykosh për vendimin e shkallës së parë, e zëmë je dënuar në shkallë të parë se ke vjedhur domate dhe kur vij në shkallë të dytë, thua jo domate s’ke vjedhur por ke ngrënë kumbulla gjatë kësaj jave. Kjo nuk është dënim.
E gjithë infrastruktura informuese e zyrës së shtypit të SPAK është kështu, aaa këtë po e mbron Mero Baze, ia tregojmë ne Mero Bazës, aaa po e mbron filani, ia tregojmë ne filanit, na këtë, thuaj këtë… As Gëbesli nuk e ka bërë dhe është turp edhe për donatorët perëndimor të zyrës së shtypit, përfshirë atë që e drejton zyrën e shtypit, i cili gati gati në disa vende paraqiste pikëpamje fondamentaliste muslimane, që shiko se ka fotografi të veshura, të zhveshura, fuste insinuata për tradhti brenda familjes, një linçim personal aq i madh sa njeriu duhet të ketë parasysh edhe faktin që është njeri ai që është brenda, ka grua, ka nënë, ka vëlla, ka rreth shoqëror, nuk ka ngelur të mbajë moralin e familjes SPAK, se ka të dashur apo jo, se e ka tradhtuar gruaja apo jo, kush ia ka dhënë këtë mandat zyrës së shtypit të SPAK? Të shpërndajë përgjime spekulative dhe të shkëputura nga konteksti për këtë punë. E bën vetëm një prokuror linçues që ka probleme personale me të dhe është jashtë standardit profesional dhe për këtë dikur do të përgjigjet.
Për mua është politikë linçusese, ndaj Metës, ndaj Veliajt, ndaj Berishës është disfatiste, e tërhequr. Unë nuk bëj betejë publike të mbroj Veliajn nga akuza për korrupsion, nëse Veliaj është i përzierë te incenratorët, te 5D, 4D, e këto, ai të hetohet, gjykohet, të mos dalë nga burgu gjithë jetën, nuk diskutoj këtë. Por nuk ka asnjë akuzë për këtë për Erion Veliajn. Erion Veliaj nuk ka asnjë akuzë, por akuzohet se gruaja ka blerë brekë të shtrenjta. Nuk ka asgjë në dosje. Ata mund ta mbajnë edhe dhjetë vjet në burg sa të gjejnë ndonjë gjë tjetër, por këtë as Aranit Çela nuk e ka bërë.
Kanë tre vjet që hetojnë Arben Ahmetajn dhe prapë shtyjnë afatet për hetim, kjo është paaftësi. Nuk ka rëndësi që ka ikur. Ç’punë ka SPAK a ka ikur apo jo Arben Ahmetaj? Le të ketë ikur Ahmetaj, të ikte edhe Meta po të donte. SPAK bën punën e vet, e heton, ai krimin e ka bërë këtu, nuk e merr me vete po iku. SPAK heton, e çon në gjykatë, thotë ka bërë këto krime, është arratisur shkoni gjejeni, për 5 minuta ta sjellin këtu. Këta nuk mbarojnë hetimin. Fati i Arben Ahmetajt që ka ikur është që nuk po rri në qeli me Erion Velinë. Në njëfarë mënyre, po ta dish që ta bëjnë kështu, është mirë të ikësh, pse do rrish këtu? Të duroj unë 2-3 vjet në burg, po të jem ministër, derisa të mbarojë tekat Olsi Dado? Jo mor. Nëse këtu nuk zgjidhet çështja e paraburgimit, që njeriu nuk paraburgoset kur nuk ka, prishje provash dhe rrezik arratisje. Nëse ti thua, unë të fus në burg dhe pastaj gjej provat, patjetër që ikën, pse të rrijë brenda në burg?”, tha ndër të tjera Baze.
