Mazhoranca qeverisëse është vënë në lëvizje për të zbardhur një herë e mirë skandalin me rrugën Durrës-Kukës. Kjo rrugë rrënoi ekonominë shqiptare dhe aty pati jashtëzakonisht abuzime. Skandali më i madh është ai i zhdukjes së 230 milionë eurove dhe për to u akuzua Lulzim Basha. Por socialistët synojnë që të bëjnë një audit të dytë në këtë rrugë dhe nëse gjenden shkelje kjo do të sjellë një tjetër padi për përgjegjësit. Gazeta ka siguruar rezolutën që Parlamenti ka hartuar për Kontrollin e Lartë të Shtetit dhe i ka kërkuar që të nisë një auditim për të gjithë shpenzimet për Rrugën e Kombit.
“KLSH, të kryejë auditimin e procedurës së prokurimit për ndërtimin e rrugës Rrëshen-Kalimash-Kukës-Morinë”, thuhet në rezolutën e Kuvendit. Po ashtu, Parlamenti i kërkon Kontrollit të Lartë të Shtetit që të zbardhë dhe të hedhë dritë mbi mënyrën se si u privatizua ish-Hotel Dajti nga Banka e Shqipërisë. “Të thellojë dhe përshpejtojë procedurat e auditimit mbi privatizimin e “Hotel Dajtit” nga Banka e Shqipërisë, për të rritur transparencën e këtij procesi dhe për të forcuar përgjegjshmërinë për zbatimin e ligjit”, thuhet në rezolutë.
Ndërsa një tjetër çështje për të cilën Kuvendi kërkon nga KLSH që të nis menjëherë auditim, ka të bëjë me koncesionet dhe minierat. “Të kryejë me përparësi auditimin e thelluar në drejtim të ndikimit në mjedis që kanë disa sektorë të veçantë, si koncesionet për ndërtimin e hidrocentraleve, dhënia e lejeve minerare etj”, thuhet në rezolutë.
Ndërkohë Kuvendi i kërkon Kontrollit të Lartë të Shtetit që të zbuloi dhe të qartësoi gjithçka që ka të bëjë me dëmet financiare të shkaktuara nga Autoriteti i Mbikëqyrjes së Lojërave të Fatit ndaj buxhetit të shtetit. “Të ndjekë me përparësi arkëtimin në buxhet të dëmit ekonomik të shkaktuar nga Autoriteti i Mbikëqyrjes së Lojërave të Fatit apo edhe institucione të tjera, në të cilat KLSH ka zbuluar dëme të konsiderueshme”, thuhet në rezolutën e Kuvendit.
Kërkesat e Kuvendit
Në rezolutë deputetet i kanë ngarkuar KLSH dhe një sërë detyrash të tjera. Sipas tyre, objektivi kryesor i veprimtarisë së KLSH-së duhet të jetë nxitja e rritjes së përgjegjshmërisë dhe transparencës për përdorimin me efektivitet, efiçencë dhe ekonomi të pasurisë publike, duke forcuar integritetin e institucionit dhe duke rritur besimin e publikut. Më tej thuhet se KLSH duhet të vijojë e thellojë përpjekjet për forcimin e pavarësisë së institucionit, për të siguruar auditime të paanshme dhe objektive. “Kryerja e veprimtarisë audituese në përputhje me kuadrin ligjor e rregullator, si dhe me standardet ndërkombëtare të auditimit mbetet një detyrë e vazhdueshme e institucionit. Kjo kërkon vijimin dhe thellimin e punës së audituesve për njohjen e legjislacionit dhe të standardeve ndërkombëtare të auditimit, të cilat janë në zhvillim. Gjithashtu, vijimi i veprimtarisë trajnuese për rritjen e kapaciteteve profesionale të audituesve është me rëndësi në këtë drejtim”, thuhet në rezolutë. Në rezolutën e Kuvendit për Kontrollin e Lartë të Shtetit vlerësohet gjithashtu edhe puna dhe performanca e këtij institucioni sa i takon vitit që lamë pas. Më konkretisht, në rezolutë thuhet se KLSH ka ushtruar veprimtarinë në përputhje me Kushtetutën, si dhe strategjinë e zhvillimit të institucionit dhe kuadrin ligjor e rregullator. /Rigels SELIMAN
