Nga Anri Bala
Kisha menduar, se një televizion publik, që të gjithë ne e paguajmë me paratë tona, nuk do të guxonte kurrë të bëhej pjesë e vulgaritetit dhe kriminalitetit informativ. Natyrisht, që televizionet private, si çdo veprimtari private, mund të bëjnë “çfarë të duan” me bizneset e tyre, megjithëse si çdo pushtet i katërt, ka detyrim moral për të promovuar dhe publikuar vlerë, por kurrë nuk mundet, që një media mbarëshqiptare, publike si TVSH, që e ka obligim ligjor politikën e informimit në interes të publikut dhe “sponsorit”… taksapaguesit shqiptarë, të promovoj figura të diskretituara politikisht dhe moralisht, si Sali Berisha.
Nuk e di, se cilën mendje pa mend, që drejton televizionin e shqiptarëve, e kishte marrë malli për të na përsëritur edhe nga televizioni publik, shfaqjet e turpshme dhe të dhunshme të çdo të enjte nga parlamenti?! Apo, këto palaço mendojnë ndryshe nga shqiptarët dhe e ruajnë me nostalgji dhe mall bëmat e legjendës së tyre, që në ’98 i zuri si “mi arash” në çark dhe i hodhi në rrugë, sapo erdhi në pushtetin e çuditshëm… pas revolucionit?!
Duhet të mbani përgjegjësi morale dhe ligjore me atë që gatuat, ju frikacakë, hajdutë të xhepave tonë. Nëse për ju poshtërimi është nder, për ne është fyerje e rëndë.
Për çfarë ishte i ftuar në studio Sali Berisha, për t’iu menderosur ju, duke ju thënë se jeni hale e Edi Ramës dhe në kohën e tij, bordelloja TVSH ishte e artë, sepse ishte “megafoni” më i përsosur i tij?!
Për çfarë ishte i ftuar Sali Berisha, për t’i dhënë mundësinë të trimërohej para shqiptarëve, se si do rrëzoi Edi Ramën?!
Për çfarë ishte aty Sali Berisha, për tu thënë shqiptarëve, se na e shiti detin bukur dhe tradhëtia e tij nuk ishte tradhëti, por zgjuarsi, burrëri, trimëri, kurse marrëveshja e re… është hajdutëri?!
Për çfarë ishte aty Sali Berisha, për të shpallur heronj hajdutët e drejtësisë dhe për tu thënë shqiptarëve, se nuk ka Reformë në Drejtësi, por luftë të Edi Ramës, ndaj prokurorëve dhe gjyqtarëve verior?!
Për çfarë ishte ftuar, për të sharë, fyer dhe nxirë njerëz e familje, që as nuk e dinë se ekziston?!
Berisha nuk ishte aty për të treguar, se si i vrau 200 djemtë e Tropojës, as se si armatosi popullin, ku mbetën mijëra të vrarë nga ato armatime, as për të treguar eshtrat e Remzi Hoxhës, e për t’i kërkuar falje Azem Hajdarit, Kosta Trebickës apo Sokol Olldashit… as për vjedhjet dhe masakrimin e demokracisë, as për 26 viktimat e Gërdecit, as për vrasjen e 4 qytetarëve dhe plagosjen e dhjetra të tjerëve më 21 Janar, as për megahajdutëritë “CEZ” dhe “Rruga e Kombit, as për Fazlliçat dhe dhjetra krime, që janë konsumuar nën pushtetin e tij?!
Berisha ishte ftuar për t’iu poshtëruar ju si media dhe ne, që e paguajmë poshtërimin tuaj me paratë tona. Ju e lutët si “kone”, që të vinte në emision, e ju vuri kusht, si i zoti i vendit, për të poshtëruar gazetarin dhe kritikun më të fortë të tij, për të na bërë një shfaqje nën tingujt e çiftelisë!
Kjo është lajthitje e madhe dhe nuk e di, se ku e gjeni këtë të drejtë, por dyshoj, se frikacakë më të mëdhenj sipër jush, ju urdhërojnë që t’i shuani mallin Marshallit të ’98-ës, duke e kthyer edhe njëherë në vendin e krimit, sikurse bënë gjithmonë ndër vite dhe në vend që të tronditet në vendngjarje, ai relaksohet, kurse ne… lebetitemi?!
Mos deshët të na kujtonit të enjten e fundit në parlament, kur nuk pushonte së ulërituri, hajdut, grabitësa, kriminelë?! Nuk e keni parë as dëgjuar ju, por ne po, sepse e kemi mësuar përmendësh refrenin e tij, që ju e paskeni aq përzemër?! Shfaqja e Sali Berishës, pa asnjë interes dhe turpëruese në televizionin shqiptar, si të jetë figura më e pastër e këtij vendi, duke vendosur kushte në emision, është e papranueshme për çdo njeri normal.
Dikush duhet të na thotë, se përse ishte i ftuar Sali Berisha në TVSH?!/Ekskluzive.al
