Jetesa e shtrenjtë e familjarëve duket se ka fundosur ish-kryeprokurorin Adriatik Llalla. Ndaj tij prokuroria ka nisur hetimet për 4 vepra penale, ndërsa pasuria është vënë në sekuestro preventive. Ditën e djeshme kanë dalë në dritë detaje nga hetimet e organit të akuzës, ku bie në sy se po zhvillohet një hetim shumë i gjerë ndaj ish-kryeprokurorit, pasi në sitë janë duke kaluar dhe anëtarët e familjes së tij.
Në dosje thuhet se hetimet ndaj tij nisën për shkak të disa komponentëve: Shpalljes non grata nga Departamenti Amerikan i Shtetit, denoncimi në media i pasurisë dhe tenderave të Llallës, si dhe nga publikimi i fotove të fëmijëve të tij, duke bërë jetesë luksoze. Deri më tani thuhej se hetimet nisën vetëm për shkak të vendimit të DASH, por prokuroria ka ngritur dyshimet mbi pasurinë e Llallës dhe për shkak të familjes.
Vajza dhe djali i Adriatik Llallës në rrjetet sociale kanë publikuar vazhdimisht foto në vende të ndryshme të botës. Po ashtu kanë nxjerrë foto në jahte, në makina e hotele luksoze. Këto foto kanë bërë bujë në media dhe prokuroria në dosje shprehet se për shkak të publikimit të tyre në media, ka nisur kryesisht hetimet, duke bërë madje dhe sekuestrimin e fotove. Në deklarimet që Llalla ka bërë pranë Inspektoratit të Lartë të Deklarimit dhe Kontrollit të Pasurive, shprehej se kishte vetëm të ardhurat nga paga, si dhe një apartament në Tiranë.
Por Komisioni i vetingut dhe prokurori zbuluan shumë prona të padeklaruara, përmes të cilave dyshohet se është bërë pastrim parsh. Por ajo që kanë parë me çudi prokurorët është se ndryshe nga sa deklaronte Llalla, fëmijët e tij shfaqeshin duke bërë jetë tepër luksoze dhe kjo ka bërë të nisin hetimet. Duket se po ndiqet i njëjti skenar si në Kroaci, pasi ish-kryeministri Ivo Sanader u arrestua vetëm për shkak të një ore të shtrenjtë.
Në media u publiku se ora e tij kapte vlerë dhjetra mijëra euro dhe prokuroria nisi hetimet duke zbuluar shumë shkelje. Por Llallën duket se po e fundosin rrjetet sociale dhe fëmijët e tij.
Pastrimi i parave
Në dosje prokuroria ka dhënë dhe arsyet se përse u kërkua që pasuria e ish-kryeprokurorit të vendoset në sekuestro. Sipas saj, ka pasur indicie se ai mund t’i shiste ato. Në dosje tregohet dhe skema që ndiqte Llalla, të cilën gazeta e tregoi pak kohë më parë. Llalla blinte tokë arë në periferitë e Tiranë, kryesisht dhe nën çmimin e tregut. Më pas bënte rivlerësim përmes autoriteteve shtetërore dhe më vonë i shiste disa fish më lartë. Kjo është parë nga organi i akuzës si një skemë e mirëfilltë pastrimi parash, qoftë për tokat, qoftë dhe për një apartament në Durrës. Sipas dosjes së prokurorisë, më 19 mars 2012 Llalla ka blerë një apartament në Plazh Durrës me sipërfaqe banimi prej 67.2 metrash katrorë me çmim prej 22 milionë lekësh të vjetra. Në atë kohë Llalla ishte Inspektori i Përgjithshëm i ILDKP-së. Por më 5 prill 2012 Llalla e ka shitur apartamentin plot 50 mijë dollarë. Organi i akuzës ka ngritur dyshime që nga vlera e ulët e blerë e apartamentit, pasi në atë zonë vështirë të gjesh me çmim 22 milionë lekësh të vjetra, por dhe mbyllja e të gjitha procedurave brenda dy javësh dhe shitja 2 herë më tepër. Mbetet të shihet se çfarë do vendosë në fund prokuroria./Kliti Topalli
