Trajneri Kristian Panuci ka qenë muajt e fundit pranë shkarkimit, si pasojë e disfatave të njëpasnjëshme të skuadrës kombëtare në tre ndeshjet miqësore të zhvilluar muajt e parë të këtij viti. Por Panuci justifikohet herë pas here se grupi këtë cilsi ka dhe se për pretendime më të mëdha duhen lojtarë të nivelit të lartë, gjë që Shqipëria nuk i ka.
Pak a shumë në këto pozita mban qëndrim edhe zëvendësi i tij Marko Kaseti, i cili ka vetëm pak muaj si pjesëtar stafi, madje në një intervistë për mediat italiane a ka zbuluar haptazi mendimin e tij, duke thënë se asnjë lojtar i Kombëtares Shqiptare nuk është për nivelin e Romës, madje as nga të rinjtë që në Shqipëri i quajnë të talentuar.
Pra, zëvendëstrajneri i përfaqësueses nuk sheh potencial te kuqezinjtë që ka drejtuar në këto muaj, pasi në një intervistë të dhënë për “Il Romanista”, ka bërë të qartë se nuk mendon që ka lojtarë të cilët mund t’ia këshillonte një klubi si Roma.
“Po shkon shumë mirë. Kam pak kohë që kam filluar, duke jetuar vetëm dy miqësore me Shqipërinë. Por deri tani është një aventurë që të përfshin. E falënderoj Panuçin, më kishte kërkuar edhe më parë për të më bërë pjesë të stafit të tij. Unë dua të përfitoj nga eksperienca e Kristian”, ishin fjalët e Kasetit, i pyetur rreth karrierës së re në pankinën kuqezi.
I ngacmuar rreth talentit të lojtarëve që ka në dispozicion, përgjigja e tij duhet të bëjë disa prej tyre të rrudhin buzët pasi duket qartësisht që zëvendëstrajneri ka pak besim te potenciali që ata kanë. “Lojtarë interesantë në Shqipëri? Ka disa te të rinjtë, por problemi është se shumë prej tyre kanë pasaporta të dyfishta dhe shpresojnë te thirrja e kombëtareve të tjera në të cilat mund të luajnë. Ndonjë për t’ia këshilluar Romës? Të mos e teprojmë!”, janë fjalët e Kasetit.
Një qëndrim i tillë nuk është aspak fyes, përkundrazi, tregon qartë se edhe vetë pjesëtarët e stafit teknik e dinë se niveli i skuadrës nuk është shumë premtues, pavarësisht se skuadra jonë përfaqësuese në ndeshjet e saj jep maksimumin e vet. Por “brumi” i skuadrës ky është dhe stafi i kryesuar nga Panuci duhet të nxjerrë më të mirën nga ky kontigjent lojtarësh.
