Sali Berisha duket se po merr dalëngadalë frenat e Partisë Demokratike. Teksa Lulzim Basha është me pushime, Berisha nuk ka qëndruar në heshtje. Madje ai ka qenë politikani më aktiv ditët e fundit, ku ka reaguar për situatën në Kosovë, ka bërë thirrje për revolta, ka pasur takime me disa përfaqësues ndërkombëtarë, etj. Por Berisha nuk ka qëndruar në heshtje dhe sa i takon aksionit opozitar në shtator.
Dje foli për mediat Edi Paloka, i cili tha se do ketë protesta, por në asnjë moment nuk përmendi revolta, duke treguar se Basha është distancuar nga dhuna. Duke e ditur këtë gjë, Berisha ka filluar të marrë në kontroll edhe bazën e PD. Gazeta ka mësuar se në shumë vende janë duke u krijuar grupe që po organizohen për protesta të dhunshme në vjeshtë.
Vetë Basha është me pushime dhe e ka lënë për në shtator organizimin, mirëpo njerëz të Berishës në bazë dhe deputetët pranë tij po mbajnë të karikuar përfaqësuesit në degë që të arrihet mosbindja civile. Vetë Berisha pak ditë më parë e tha hapur se në shtator do kërkohet të shkohet te shembulli rumun. Deri më tani Berisha nuk e ka pasur pas vetes Bashën dhe ish-kryeministri ka filluar ta anashkalojë. Në protestën e 26 majit pati një përplasje të fortë mes tyre.
Berisha nxiti dhunën dhe kërkoi sulm ndaj Ministrisë së Brendshme, por Basha ndërhyri dhe tërhoqi turmën duke rrëzuar skenarët e Berishës dhe të LSI. Gazeta e ka thanë se Berisha e Meta janë bërë bashkë dhe po synojnë të çojnë vendin drejt qeverisë teknike. Por Rama i ka bërë një ftesë publike Bashës dhe nuk përjashtohet mundësia që të ketë një takim mes tyre në vjeshtë.
Kjo ka alarmuar dyshen Meta-Berisha dhe skenari i tyre kryesor është destabilizimi civil. Për të arritur këtë duket se Berisha po mbledh pas tij deputetë dhe krerë degësh, ndërkohë që dhe LSI është duke përgatitur elektoratin e saj për trazira. Mazhoranca do të rrëzojë në fillim të shtatorit dekretin e Ilir Metës për teatrin dhe kjo do shfrytëzohet për protesta, të cilat më pas pritet që të përshkallëzohen.
