Shqipëria do të luajë më 7 shtator kundër Izraelit, në ndeshjen e parë në grup në Divizionin C të Ligës së Kombeve, aktivitet që luhet për herë të parë në këtë format. Në grupin tonë është dhe Skocia, gjithashtu një kundërshtar i vështirë. Trajneri Kristian Panuçi dëshiron ta nisë mbarë këtë edicion me Kombëtaren, por një pjesë e mirë e lojtarëve nuk janë në kapacitetin e tyre maksimal. Në kuadër të këtij takimi tekniku italian i kuqezinjve do të përpiqet të gjejë lojtarët adaptë për të përballuar Izraelin dhe për të marrë një fitore që do të kishte vlerë për vazhdimësinë dhe do t’i jepte skuadrës frymëmarrje dhe lehtësi morale për të përballuar aktivitetin. Natyrisht, Shqipëria ka plot lojtarë të mirë, të cilët luajnë me klube të njohura dhe janë në formë të mirë, të cilët japin siguri në pozicionet që luajnë dhe janë madje ndër më të mirët në Europë. Shembull janë dy portierët, Thomas Strakosha dhe Etrit Berisha, por edhe lojtarët e tjerë. Në javën e parë të kampionatit italian spikati mbrojtësi Elseid Hysaj, i cili u shndërrua në lider të Napolit dhe bëri një ndeshje të përkryer kundër Lacios së Thomas Strakoshës. Hysaj ishte pozicionuar në krah të djathtë të mbrojtjes si zakonisht, teksa mediat italiane thanë pas takimit se Hysaj kishte shkatërruar 13 aksione të lacialëve dhe ishte ndër futbollistët që kishte marrë elozhetë e trajnerit Karlo Ançeloti, për cilësinë e performancës, ndihmesën që i dha grupit dhe natyrisht për rolin në fitoren e skuadrës së tij, pasi dihet që Napoli fitoi në fund me Lacion me përmbysje, 2-1. Sikurse shprehen dhe vetë mediat italiane, ai mund të kritikohet për lojën ofensive, por sa i përket asaj mbrojtëse pakkush është si Elseid Hysaj në Serinë A. Mbrojtësi i përfaqësueses shqiptare ka lënë shenjë që në javën e parë të kampionatit, pasi është menjëherë një nga liderët sa i përket lojës mbrojtëse në futbollin italian në këtë sezon. Hysaj rezulton deri tani të jetë futbollisti që ka rikuperuar më shumë topa, duke ndërprerë aksionet e kundërshtarëve në ndeshjet e para të sezonit në Itali. Në takimin kundër Lacios, ai ishte futbollisti i cili u tregua më efikas duke ndalur kundërshtarin, duke ndërprerë lojën e futbollistëve që kishte përballë në 13 raste, një statistikë shumë domethënëse, duke llogaritur se është një mbrojtës krahu.
Nis shitja e biletave për ndeshjen me Izraelin
Ka nisur shitja e biletave për ndeshjen e parë zyrtare eliminatore të ekipit kombëtar të futbollit, SHQIPËRI-IZRAEL për kompeticionin e UEFA Nations League, e cila do të luhet në datën 7 Shtator 2018 në orën 20:45, në stadiumin “Elbasan Arena”, në Elbasan. Shitja e biletave do të jetë në disa pika në qytete të ndryshme të Shqipërisë në një kohë që, prej disa javësh ka nisur edhe në faqen zyrtare të FSHF-së fshf.org në internet, në linkun përkatës: bileta.fshf.org, shitja e biletave online për secilën kategori të stadiumit. Tashmë, për të gjithë sportdashësit që duan të ndjekin takimin e skuadrës kombëtare në 7 shtator, të drejtohen në të gjitha pikat e mëposhtme, për të siguruar një vend në “Elbasan Arena” për sfidën e parë në UEFA Nations League të kuqezinjve. Paralelisht me pikat e shitjes do të gjeni më poshtë edhe çmimet e biletave përkatëse. Shitja e biletave do të bëhet në pikat e më poshtë shënuara: • Tiranë: Dyqani i FSHF-së “Macron”, rruga Elbasanit/ Nga e hëna në të dielë/ Ora 08:00-20:00. • Tiranë: Biletaria pranë stadiumit Selman Stermasi/ Çdo jave nga e enjtja në të dielë/ Ora 12:00- 18:00. • Durrës: Biletaria pranë stadiumit Niko Dovana/ Hapur prej datës 27 Gusht- 7 Shtator/ Ora 09:00-13:00. • Korçë: Kancelaria përballë Kinema Millenium/ Nga e hëna në të dielë/ Ora: 09:00-21:00.
