Artistët që nuk janë pjesë e institucioneve të artit dhe kulturës me kontrata të përhershme do të kenë mundësi që për angazhime të përkohshme të negociojnë të vetëm pagesën e tyre.
Një ndryshim në ligjin “Për artin dhe Kulturën” i nxjerrë tashmë për konsultim sanksionon në nenin 34 se ky grup do të kenë mundësi që të negociojë me institucionin me të cilin ka marrëveshjen për pagesën që kërkon.
“Marrëdhëniet financiare për kontributin e angazhimit të përkohshëm në projektet artistike me artistin jashtë sistemit të institucioneve publike të artit dhe kulturës rregullohen me kontratën e lidhur mes artistit dhe institucionit publik financues nëpërmjet negocimit” thuhet në ndryshimin e bërë.
Sipas sqarimit të Ministrisë së Kulturës në relacionin shoqërues të projektligjit kjo marrëdhënie është konceptuar kështu në mënyrë që të mos preket figura e artistëve dhe secili të vlerësohet sipas cilësisë artistike që ka.
“Për sa i përket aspektit të cilësisë artistike (honorar) me artistë nga jashtë sistemit, ky tagër dhe negocim u është lënë palëve me negocim, kjo në respekt dhe vlerësim të figurës, personalitetit dhe meritokracisë, bazuar në ofertën e tregut dhe profesionalitetit artistik të artistit” thuhet në relacion.
Drafti bën edhe një seri ndryshimesh të tjera të lidhura me ndryshimet që bëri ligji për trashëgiminë kulturore dhe muzetë. Kjo do të thotë se institucionet e reja dhe ato të rikonceptuara zënë vendin e tyre edhe në këtë projektligj. Galeria e Arteve ndryshon emër në Muzeu Kombëtar i Arteve të Bukura.
“Galeria Kombëtare, në kuadër të një rikonceptimi të plotë në përmbajtje, por edhe infrastrukturore, për sa kohë disponon fond kombëtar të rëndësisë së veçantë, do të kryejë dy funksione, atë të muzeut, që do të thotë fondet do të jenë të ekspozuara për publikun në linja të caktuara dhe njëkohësisht funksionin e zhvillimit të ekspozitave të përkohshme të autorëve të traditës dhe atyre bashkëkohorë. Ky ndryshim i emërtesës ka hyrë në fuqi me miratimin e ligjit të ri për trashëgiminë kulturore dhe muzetë” thuhet në shpjegimin e ministrisë për draftin.
Po kështu ligji shton si grup edhe subjektet private jo vetëm ato publike që do të kujdesen për marrëdhëniet me subjekte individë, artistë krijues, interpretues, autorë, producentë etj., aplikues të ndryshëm, të cilët kryejnë dhe iniciojnë veprimtari kulturore artistike dhe hyjnë në marrëdhënie me institucionet e artit dhe kulturës në Republikën e Shqipërisë./Monitor/
