Operacioni Ndërkombëtar i Monitorimit duket se nuk do të lejojë asnjë gjyqtar dhe prokuror të korruptuar që të kalojë me sukses procesin e vetingut. Edhe pse Komisioni i Pavarur i Kualifikimit ka devijuar në disa raste, përfaqësuesit e Shteteve të Bashkuara të Amerikës dhe Bashkimit Europian kanë ndërhyrë që ligji të zbatohet korrekt për të gjithë njerëzit e sistemit të drejtësisë. Gazeta ka mësuar se 21 gjyqtarët dhe prokurorët e shkarkuar nga komisionet e vetingut në thuajse shumicën e rasteve janë fundosur nga ONM. Madje, kanë qenë ndërkombëtarët, ata të cilët kanë zbuluar provat më të forta që vërtetonin përfshirjen e njerëzve të drejtësisë në afera. Sipas informacioneve, ONM ka shtrirë përtej kufijve kontrollin për gjyqtarët dhe prokurorët, me qëllimi zbulimin e aferave të tyre. Kjo lëvizje e ONM, vjen pasi ONM ka vënë re se shumë gjyqtarë dhe prokurorë kanë deklaruar në deklaratën veting por edhe gjatë seancave dëgjimore para Komisionit të Pavarur të Kualifikimit shuma të mëdha monetare të përfituara nga emigracioni, qofshin këto para të përfituara nga vetë ata, ose nga të afërm apo kushërinjtë e tyre. Pra, duke qenë se shumë prej tyre nuk kanë asnjë dokumentacion që të vërtetojnë autenticitetin e këtyre të ardhurave, komisioni vetingut mësohet se ka kryer dhe po kryen verifikime në shtetet të ndryshme të botës. Ekspertë të Operacionit Ndërkombëtar të Monitorimit kanë udhëtuar në shtete si Greqia, Italia apo vende të ndryshme të rajonit, me qëllim marrjen e sa më shumë informacioneve sa i takon udhëtimeve apo punëve të ndryshme që kanë bërë gjyqtarët dhe prokurorët. Po ashtu, mësohet se ekspertët e ONM-së gjatë verifikimeve që kanë bërë në këto shtetet, kanë pasur edhe kontakte dhe takimi me të afërt apo të njohur të njerëzve të drejtësisë, duke i marrë në pyetje, në mënyrë që gjatë procesit të rivlerësimit të bëjnë një analizë sa më të detajuar dhe objektive. Megjithatë, kjo lëvizje e ndërkombëtarëve, sa i takon kontakteve me të afërm të gjyqtarëve dhe prokurorëve, vjen, pasi shumë nga këta kanë deklaruar se një pjesë të pasurisë e kanë marrë hua apo e kanë dhuratë nga kushërinjtë.
Verifikim sistemit TIMS
Një tjetër lëvizje interesante që Operacioni Ndërkombëtar i Monitorimit po bën në kuadër të procesit të vetingut, është verifikimi i sistemit TIMS. Sipas informacioneve, ekspertët e ONM kanë verifikuar gjithë hyrje-daljet që kanë bërë gjyqtarët dhe prokurorët, në mënyrë që të kenë një panoramë të qartë dhe të detajuar për çdo qindarke të shpenzuar apo të deklaruar nga ana e njerëzve të drejtësisë në kuadër të procesit të rivlerësimit kalimtar. Po ashtu, ekspertët e Operacionit Ndërkombëtar të Monitorimit kanë mbajtur dhe vijojnë të mbajnë në vëzhgim edhe të gjitha lëvizjet e llogarive bankare të gjyqtarëve dhe prokurorëve. Megjithatë, mbetet për t’u parë në ditë në vijim se çfarë do të prodhojnë më tej këto verifikime gjatë procesit të vetingut për prokurorët dhe gjyqtarët, të cilët nuk kanë dalë ende para Komisionit të Pavarur të Kualifikimit në seancat dëgjimore. Sidoqoftë, një gjë është e sigurtë që pa mbështetjen e ndërkombëtarëve, kryesisht Operacionit Ndërkombëtar të Monitorimit vetingu nuk do të kishte suksesin e arritur deri më tani. /Rigels Seliman
