Prokuroria e Tiranës ka nisur dje hetimet për audio-përgjimin ku dëgjohet biseda mes nënkryetarit të KQZ, Denar Biba dhe gjyqtarit shqiptar të Gjykatës së Strasburgut, Ledi Binaku. Pas publikimit të audio-përgjimit në disa portale, opozita menjëherë nisi akuzat në drejtim të qeverisë dhe prokurorisë duke kërkuar shkarkimin e menjëhershëm të Sekretarit të Përgjithshëm të Këshillit të Ministrave, Engjëll Agaçi si dhe vënien para drejtësisë të nënkryetarit të KQZ, Denar Biba. Por pavarësisht akuzave të opozitës, organi i akuzës dje ka nisur menjëherë hetimet ndaj këtij audio-përgjimi. Edhe pse nuk jepen detaje mbi këtë hetim, është mësuar se prokuroria po përpiqet të identifikojë personin që ka nisur bisedën e pjesshme pranë portalit që e publikoi, në mënyrë që të zbardhë të gjithë bisedën e plotë dhe për të verifikuar nëse është ushtruar presion ndaj gjyqtarit të Gjykatës së Strasburgut, Ledi Binaku apo jo. Prokuroria pritet që shumë shpejt të kryejë ekspertizat e nevojshme dhe të dalë në një përfundim në lidhje me këtë çështje.
Ndërkohë edhe pse prokuroria ka nisur hetimet në lidhje me këtë çështje, nënkryetari i KQZ, Denar Biba duke mos mohuar bisedën ka kërkuar dje që të dalë biseda e plotë pasi nuk ka pasur asnjë shantazh. Sipas tij, metafora e trenit ishte në përgjigje të pyetjes që kishte bërë gjyqtari Binaku. “Metafora e trenit ishte në përgjigje të pyetjes që Bianku më bëri mua se “përse pranova detyrën e kryetarit të KPP”, duke qenë se ishte në dijeni të aspiratës sime për Gjykatën Kushtetuese. Ja kaq e thjeshte është. Mjaft të dëgjoni bisedën e plotë, dhe do ta kuptoni që “sakrifica” e përfolur ishte e imja dhe s’kishte asnjë lidhje me z. Bianku. Isha unë që pranova një detyrë që nuk e doja”, tha ai për një media tjetër. Megjithatë, kujtojmë këtu se ky është audio-përgjimi i dytë pas atij të Babales, ku u mendua se vëllai i ministrit Xhafaj ishte i përfshirë në trafik droge. Audio-përgjim që deri më sot nuk ka asnjë konkludim nga ana e prokurorisë si dhe nga ana e opozitës e cila e publikoi vetë këtë bisedë.
