Kryeministri Edi Rama ka sulmuar ditën e djeshme Lëvizjen Socialiste për Integrim sa i takon punësimeve në administratën shtetërore. Duke folur në takimin e organizuar në Sallën e Hartave në Kryeministri me koordinatorët e Bashkëqeverisjes, shefi i qeverisë u shpreh optimist, teksa deklaroi se platforma “Shqipëriaqëduam” ia ka dalë për të zgjidhur problemet qytetarëve. Por pavarësisht se falë platformës janë shmangur burokracitë në administratë, Rama bëri me dije se shushunjat e partisë, duke lënë të nënkuptohet këtu militantët e LSI, vijojnë të jenë nëpër këmbë në zyrat e shtetit. Megjithatë, i pari qeverisë shtoi se rruga e ndryshimit ka filluar, ndërsa siguroi qytetarët se do të nisë një hetim administrativ për të gjithë nëpunësit që kanë abuzuar me fondet dhe me detyrën. “Platforma është në fakt rruga më e shkurtër. Është shumë më e shkurtër se rruga e mikut, se rruga e partisë, se rruga e ryshfetit dhe është një armë shumë efikase edhe për të çliruar çdo ditë mbi bazë të eksperiencave dhe mbi bazë të hetimeve administrative që pasojnë zgjidhjen e problemeve, administratën tonë nga shushunja dhe nga parazitë e grabitqarë, që janë ende nëpër këmbë në zyrat e shtetit, ku për hir të së vërtetës ka filluar të ndihet një ndryshim, ka filluar të ndihet një aktivitet shumë më i përgjegjshëm dhe ka shumë më tepër zgjidhje pavarësisht edhe vetë platformës”, deklaroi ai.
Rama thirrje qytetarëve
Kryeministri Edi Rama iu bëri apel qytetarëve që t’i bashkohen platformës, si e vetmja rrugë që zgjidh hallet e tyre. Madje, Rama deklaroi se platforma është një “armë” e fortë në duart e qytetarëve duke i dhënë njëherë e përgjithmonë fund ecejakeve të tyre sfilitëse nëpër zyrat e shtetit. “Për të promovuar platformën nëpërmjet zërit të vetë qytetarëve që e kanë shfrytëzuar dhe kanë marrë zgjidhje. Një zë i besueshëm dhe që përcjell drejtpërdrejt eksperiencën me platformën dhe inkurajon, besojmë ne, të tjerët që të mos ngurrojnë. Për më tepër, dua ta përsëris atë që kam thënë sa herë më është dhënë mundësia të flas për platformën, vetëm 3 minuta,- dhe për këdo që ka humbur vite apo ka humbur muaj në pritje të zgjidhjes së një problemi apo një halli sepse nuk e ka gjetur atë që është konsideruar tradicionalisht si rruga më e shkurtër, ndërkohë që dera e një zyre ka qenë e mbyllur, -tre minuta, nuk janë asgjë për të na vënë në provë”, u shpreh ai.
Ndjekje penale për parazitët në administratë
Sa i përket asaj pjese të administratës që Rama e quan parazite, kryeministri kërkoi bashkëpunimin e qytetarëve që të denoncojnë çdo rast padrejtësie. Shefi i qeverisë theksoi se është i vendosur për të luftuar hajdutët që sipas tij, sorollasin qytetarët, ndërsa bëri publike edhe rastin e shkarkimit të dy nëpunësve të shtetit. Madje, Rama garantoi qytetarët se nëpunësit e shtetit që nuk u japin zgjidhje halleve të qytetarëve jovetëm do të shkarkohen nga puna, por do të shkojnë edhe për ndjekje penale. “Ka pasur pothuajse çdo herë që kemi bërë eventin e përjavshëm një dëshmitar, dy nganjëherë, lidhur me pensionin, lidhur me vështirësitë për të marrë atë që i ka takuar, në raport me institucionin përkatës së sigurimeve shoqërore. Ashtu sikundër, e tha Egesta, ne nuk mjaftohemi me zgjidhjen e problemit, por i shkojmë pas për të gjetur përgjegjësit. Në rastin e zonjës, janë dy nëpunës, të cilët kanë mbuluar rastin, që janë ndëshkuar me masën përkatëse administrative. Masat variojnë nga vërejtjet, deri në ndjekje penale, pas kuptohet, lirimit nga detyra. Albana do të prezantojë një rast që lidhet me sipërmarrjen”, nënvizoi ai./Rigels SELIMAN
