Komisioni i Pavarur i Kualifikimit i ka rrëzuar planin presidentit Ilir Meta për shortin e KED. Prej disa kohësh presidenti Ilir Meta është përplasur në distancë me kreun e Kuvendit, Gramoz Ruçin për çështjen e hedhjes së shortit për vendet vakante të krijuara në KED. Kreu i Kuvendit Gramoz Ruçi i ka bërë shpesh thirrje presidentit që të hedh shortin ose t’ia kaloj kompetencat Kuvendit, por Meta i është përgjigjur se ai do të respektojë kushtetutën për KED. Duke shtyrë kështu për në dhjetor hedhjen e shortit. Por kjo gjë do të sjellë pasoja në sistemin e drejtësisë. KED momentalisht nga 9 anëtarë që duhet të ketë, ka ngelur me 4 dhe nuk merr dot vendime. Kjo për faktin se 5 anëtarë të këtij organi kanë ngelur në veting, 1 e ka kaluar ndërsa 3 të tjerë nuk kanë hyrë akoma në proces.
Por edhe pse Meta po shpresonte që ta shtynte hedhjen e shortit për vendet vakante të KED në dhjetor, duke mbajtur kështu të bllokuar Gjykatën Kushtetuese dhe Inspektoratin e Lartë të Drejtësisë, Komisioni i Pavarur i Kualifikimit ja ka hedhur poshtë këtë plan. Gazeta ka mësuar se KPK, krahas shortimit ka mbyllur dhe procesin e rivlerësimit për listën e dytë prioritare të subjekteve të rivlerësimit ku janë dhe 4 anëtarët e mbetur të KED. Sipas njoftimit do t’i nënshtrohet si fillim vetingut gjyqtari i Apelit Gjirokastër, Enton Dhimitri; dhe ai i Apelit Tiranës, Fatos Qato. E më pas gjyqtari i Gjykatës Administrative të Shkodrës, Ahmet Jangulli dhe ai i Apelit të Korçës, Sotiraq Lubonja.
Një gjë e tillë do të thotë se meqenëse janë emra prioritarë në listë, procesi i vetingu për 4 anëtarët e KED mund të mbyllet brenda shtatorit. Pikërisht kjo gjë do të detyrojë presidentin Meta që ta hedh shortin më përpara nga sa kishte menduar. Gazeta ka mësuar se njëri prej katër subjekteve të KED pritet të ngelë në veting pasi shpesh Ministria e Drejtësisë i ka kërkuar KLD që ta shkarkojë, pasi nuk është i përshtatshëm për detyrën.
Kjo do të thotë se Presidenti do detyrohet ta hedh shortin. Por edhe nëse këta të katërt konfirmohen, KED nuk do vijojë dot të marrë vendime. Dhe me përfundimin e procesit të vetingut, KED do të duhet të fillojë nga puna ç’ka do ta detyrojë presidentin Meta që të hedh menjëherë shortin për plotësimin e vendeve vakante duke mos pritur dhjetorin.
Pasojat
Mosfunksionimi i Këshillit të Emërimeve në Drejtësi ka bërë që të bllokohet edhe puna e Gjykatës Kushtetuese dhe Inspektoriatit të Lartë të Drejtësisë. Kushtetuesja sot është me 1 anëtar për shkak të procesit të vetingut duke mos marrë dot vendime në lidhje me çështje të ndryshme. Zhbllokimi i Kushtetueses, sipas ligjit, mund të bëhet vetëm nga Këshilli i Emërimeve në Drejtësi, që presidenti Meta vijon ta mbajë peng. Sipas ligjit, Kushtetuesja ka në përbërjen e saj 9 anëtarë, nga të cilët, 3 zgjidhen nga Presidenca, 3 nga Gjykata e Lartë dhe 3 nga Kuvendi.
Por të tre këto institucione para se të zgjedhin kandidatët duhet më parë që të marrin aprovimin e KED, i cili bën renditjen e kandidatëve. Pikërisht mosaprovimi i kandidatëve nga ana e KED, i cili vijon të jetë i bllokuar, ka bërë që dhe puna në Gjykatën Kushtetuese të jetë e bllokuar. Por nga ana tjetër ky skenar i bllokimit të punës së Kushtetueses duket se i intereson presidentit Meta.
Kjo për faktin se mosfunksionimi i Gjykatës Kushtetuese do të shty për një periudhë të mëvonshme marrëveshjen e detit me Greqinë. Presidenti Meta ka dhënë prej kohësh sinjale se do të presë Gjykatën Kushtetuese para se të jap aprovimin për nënshkrimin e marrëveshjes. Ndërkohë që nuk po merr vendim për të zhbllokuar KED, i cili më pas do t’i hapet rrugë rifillimit të punës në Gjykatën Kushtetuese.
Endri Arizi
