Qytetarëve nga vendet e Ballkanit, përfshirë këtu edhe Shqipërinë, për të udhëtuar në hapësirën Schengen do t’iu duhet të pajisen pas tre vitesh (2021) me një autorizim.
Zëdhënësi i Komisionerit për Migracionin dhe Shtetësinë, Dimitris Avramopolus, shpjegon në një intervistë për Tv Klan sistemin elektronik përmes së cilës do të merret autorizimi si dhe procedurat që duhet të ndiqen.
“ETIAS është një sistem autorizimi elektronik, siç është ai i Kanadasë, SHBA-së apo Australisë. Sipas statistikave që kemi, shumica dërrmuese e aplikantëve nuk do kenë problem për të marrë një përgjigje pozitive dhe autorizim për udhëtim.
Aplikimi është shumë i shpejtë dhe i lehtë për t’u bërë. Ai merr normalisht 10 minuta, dhe përfundon me një përgjigje pozitive dhe autorizim brenda. Ajo që duhet theksuar është që nuk është një vizë, por një autorizim udhëtimi”, thotë ai.
I pyetur për kategoritë apo personat që rrezikojnë t’iu refuzohet aplikimi, Avramopolus thotë:
“Në raste kur sistemi sinjalizon një anomali, verifikimi do të bëhet në mënyrë manuale. Edhe këtu ne presim që verifikimi të çojë në një rezultat pozitiv. Nëse nuk çon në një përgjigje pozitive, kjo do të thotë që ka një alarm të caktuar për personin në fjalë. Për shumicën dërrmuese të rasteve, përgjigja është automatike.
Kur bëhet aplikimi elektronik, duhet vetëm pasaporta. Sistemi pastaj bën verifikimin automatik në bazë të disa grupimeve të të dhënave, siç është sistemi i informacionit të Schengenit, Europoli, etj.
Nëse sinjalizohet një anomali, verifikimi do të bëhet në mënyrë manuale nga autoritetet e shtetit ku kërkon të udhëtojë personi, ose nga Rojet Europiane Kufitare. Në këtë rast, përgjigjja e aplikimit do të marrë disa ditë dhe nëse ka një problem që duhet zgjidhur, atëherë përgjigja do të marrë maksimumi 4 javë”.
