Telekom Albania, operatori i madh i telefonisë celulare ka dalë në shitje. Edhe pse nuk ka një njoftim zyrtar, burimet thanë se kanë nisur negociatat e shitjes. Sipas burimeve për Opinion.al ofertuesi kryesor është “Telekom Serbia”.
Prej disa muajsh kompania është në procesin e “Due Diligence” dhe brenda tetorit pritet që stafit të brendshëm t’i komunikohet blerësi i ri.
Sakaq, të interesuara përpos Telekom Serbia janë edhe kompani të tjera në Ballkan. Kështu Economic.bg shkruan se “Biznesmeni Spas Rusev, një aksionar kryesor në Vivacom, është duke negociuar blerjen e operatorit të dytë më të madh të telefonisë celulare, Telekom Albania, që është pronë e gjigantit gjerman Deutsche Telekom”.
Mediat bullgare thonë se bëhet fjalë për blerjen e Telekom Shqipëri në mënyrë të pavarur pa partnerët e Vivacom. “Parashikimi është se bisedimet do të zgjasin për të paktën edhe 3 deri në 6 muaj, dhe përveç Rusevit ka tre ose katër kandidatë në garë për telekomin shqiptar”, shkruajnë mediat bullgare.
Revista ekonimike “Monitor” raporton se përveç Vivacom, në garë është edhe operatori tjetër bullgar Globul Telenor. Një tjetër i interesuar është manjati grek i naftës dhe transporteve Vardis Vardinogiannis. Ai është CEO dhe aksioneri kontrollues i Motor Oil Hellas, Vegas Oil and Gas dhe ka interesa në shumë biznese të tjera transporti.
