Klasa politike e korruptuar në Shqipëri duket se nuk do ja hedhë dot paq. Reforma në drejtësi ka hyrë në shinat e duhura dhe qeveria bashkë me SHBA e BE duket se janë të vendosura për ta çuar deri në fund procesin. Gazeta ka siguruar një raport të Ministrisë së Drejtësisë, ku jepen detaje të ecurisë së reformës në drejtësi përgjatë vitit 2018, ndërsa paraqiten dhe planet për ditë në vijim. Në këtë raport janë disa kapituj kushtuar organeve të reja, duke filluar nga KLGJ, KLP e duke përfunduar te SPAK. Po ashtu është bërë një bilanc i kostos së reformës në çdo sektor.
Aty bëhet e ditur se ngritja e organeve të reja, pra e KLGJ, KLP dhe SPAK, organe që do të luftojnë korrupsionin dhe parregullsitë në drejtësi e politikë, do kushtojë 98 milionë euro. Këto para do të dalin një pjesë nga buxheti i shtetit, ndërsa pjesa më e madhe do të jenë fonde nga Bashkimi Europian dhe nga Shtetet e Bashkuara të Amerikës.
Po në raport bëhet e ditur se ka nisur përzgjedhja e gjyqtarëve, prokurorëve dhe e ekspertëve që do të jenë pjesë e SPAK. Aty thuhet se duke qenë se SPAK nuk ka marrë jetë, është Shkolla e Magjistraturës ajo që po kryen trajnime sa i takon luftës antikorrupsion dhe po bën gati si gjyqtarët dhe prokurorët që do garojnë për në SPAK, por dhe stafin mbështetës. BKH dhe SPAK do kenë me qindra ekspertë që do merren me krimin ekonomik, organizata kriminale, korrupsionin, etj. Sipas raportit, në kuadër të përgatitjes për ngritjen e SPAK janë trajnuar rreth 170 emra. “Për shkak të moskostituimit të organeve të Prokurorisë së Posaçme, Shkolla e Magjistraturës ka zhvilluar disa aktivitete trajnuese për anti korrupsionin me gjyqtarë dhe prokurorë, konkretisht: 12 janar 2018 “Parandalimi dhe goditja e krimit të organizuar, trafikimit, korrupsionit dhe veprave të tjera penale”; 30-31 janar 2018 “Bashkëpunimi ndërinstitucional në procesin e hetimit dhe gjykimit të veprave penale. Roli i Policisë Shkencore; Bashkëpunimi i gjyqësorit dhe prokurorisë me Policinë Shkencore”; 28 mars 2018 “Parandalimi dhe goditja e krimit të organizuar, trafikimit, korrupsionit dhe veprave të tjera penale; 16-17 maj 2018 “Veprat penale në fushën e krimit ekonomik dhe korrupsionit”; 5. 20 – 21 qershor 2018 “Hetimet proaktive në luftën kundër krimit të organizuar dhe terrorizmit”; 3. 27- 28 qershor 2018 “Grupi i strukturuar kriminal, si formë e veçantë bashkëpunimi’”, thuhet në raport. Për këto trajnime janë shpenzuar rreth 7 milionë lekë të vjetra dhe emrat që kanë marrë pjesë do jenë të parët që do garojnë për SPAK. Nga gjithë kostoja e reformës, bëhet e ditur se 2 milionë euro do të shkojnë vetëm për rekrutim stafi dhe trajnime me qëllim luftimin e korrupsionit.
Përgjimi i politikanëve
Në kuadër të ngritjes së SPAK, qeveria ka planifikuar dhe blerjen e pajisjeve speciale, që do të sjellin arrestimin e pushtetarëve. Sipas planit, do të shpenzohen 1.600.000 euro për të blerë pajisje përgjimi. Raportimi për vitin 2017 jep detaje për kontratën e blerjes dhe koston.
Ndërkohë në muajin qershor 2018, në kuadër të rishikimit të paketës kombëtare të projekteve strategjike Prokuroria e Përgjithshme ka identifikuar nevojën për mbështetje për decentralizimin e përgjimeve. Po ashtu më tej thuhet se Shkolla e Magjistraturës ka zhvilluar disa aktivitete për prokurorët me tema si: Përgjimi si mjet për kërkimin e provës në procesin penal; teknikat e posaçme të hetimit; hetimet proaktive. Raporti, tregon qartë se qeveria ka një plan të detajuar për ngritjen e të gjithë organeve të reja dhe tani pritet vetëm ngritja e KLGJ. 2 muaj pas saj, SPAK dhe Byroja e Hetimit do marrë jetë.
Kliti Topalli
