Departamenti Amerikan i Drejtësisë rrezikon të fundosë kreun e PD Lulzim Basha dhe partinë e tij sa i takon lobimeve të bëra në SHBA një vit më parë. Prokuroria ka nisur një hetim ndaj partisë më të madhe opozitare, pasi dyshohet se ajo ka shmangur deklarimet në KQZ mbi vlerat e lobimit. Gazeta “SOT” para paka ditësh publikoi e para se në Prokurorinë e Tiranës ka ardhur një dosje nga SHBA mbi lobimet e PD, ndërkohë që në ditë në vijim pritet të vijë dhe një dëshmi e Nicolas Muzin, personi me të cilin Basha lidhi marrëveshjen. Por gazeta ka mësuar detaje nga ajo se çfarë përmbajnë këto dokumente, të cilat lëkundin pozitën e Bashës dhe të PD. Sipas burimeve, në letër-porosinë që prokuroria ka dërguar në SHBA, janë shkruar një sërë pyetjesh, ku së pari kërkohej të dihej nëse ka pasur marrëveshje mes PD dhe kompanive “Biniatta Trade LP” e “Muzin Capitol Partners”.
Në përgjigje të SHBA, është konfirmuar që ka pasur një marrëveshje të tyre. Më pas është kërkuar të dihet shuma që Muzin ka deklaruar si të ardhura nga pakti me demokratët. Në përgjigje Departamenti Amerikan i Drejtësisë i ka vënë në dispozicion të gjitha kontratat. Një pjesë e madhe e tyre dihen, por prokuroria i kërkoi ato në mënyrë zyrtare dhe ato janë të vulosura në mënyrë që të shërbejnë si prova nëse çështja shkon në gjykatë. Në dosje janë të gjitha kontrata që janë firmosur nga Basha me “Biniatta Trade LP” dhe “Muzin Capitol Partners” për vititn 2017, shoqëruar me vlerat përkatëse dhe me detyruat që PD kishte ngarkuar ndaj kontraktuesve.
Po ashtu është dorëzuar një fashikull, ku tregohet se si krejt papritur ‘Muzin Capitol Partners’, ndryshoi bilancet e saj në Departamentin Amerikan të Drejtësisë dhe deklaroi e ishte paguar 3 herë nga PD. Dy herë para janë derdhur nga vetë PD dhe një herë pagesa është bërë nga ‘Biniatta Trade LP”. Nesër gazeta do të nxjerrë me detaje vlerat e deklaruar dhe dokumentet përkatëse, ku bëhet një panoramë e qartë se sa para kanë deklaruar amerikanët dhe sa ka deklaruar PD në KQZ. Në prokurori janë dorëzuar të gjitha të dhënat e derdhjeve në thesar nga kompanitë dhe transaksionet. Në adresë të Muzin Capitol, PD ka bërë një pagesë në muajin mars dhe një në muajin qershor. Ndërkohë në fund të marsit është bërë një pagesë nga “Biniatta Trade LP”.
Gazeta ka mësuar se nuk përputhen deklarimet që ka bërë Nicolas Muzin në Departamentin Amerikan të Drejtësisë me ato që ka deklaruar PD në KQZ. Bëhet fjalë për një shumë të madhe dollarësh që nuk dihet se si ka shkuar në duart e tij. Vetë FBI ka nisur hetimet për rastin dhe atje është marrë në pyetje Nicolas Muzin. Gazeta ka mësuar se fashikulli me deklarimet e tij do i dorëzohet shumë shpejt Prokurorisë së Tiranës. Në ditët në vijim gazeta do tregojë të dhënat se sa është shumë që nuk përputhet, të gjitha pagesat me data përkatëse që Muzin ka deklaruar në SHBA dhe problemet me kontratat.
Kontratat
Më 22 mars, gjatë njërës prej vizitave të tij në Uashington, lideri i Partisë Demokratike, Lulzim Basha ka firmosur një kontratë me kompaninë e lobimit “Stonington Strategies” me vlerë 25 mijë USD në muaj për një periudhë tre mujore. Sipas të dhënave të deklaruara nga “Muzin Capital Partners LLC” në Departamentin e Drejtësisë në SHBA, qëllimi i kësaj kontrate ishte “projektimi dhe implementimi” i fushatës së Partisë Demokratike për zgjedhjet parlamentare; promovimi i qëllimeve të Partisë Demokratike në media dhe pranë bizneseve dhe figurave politike në SHBA. Gjithashtu “Muzin Capitol Partners” raportonte se do ndihmonte Partinë Demokratike në krijimin e një lëvizjeje konservatore në Shqipëri.
Kliti Topalli
