Avokati Romeo Kara ka reaguar dje, pas vendimit të prokurorisë për të shtyrë afatin hetimor për aferën e CEZ. Duke qenë se ai është një prej paditësve, Kara ka deklaruar se prokuroria nuk duhet të ngelet vetëm te Nuel Kalaj. Sipas tij, në dosje ka shumë prova të tjera që rëndojnë pozitat e të akuzuarve.
“Hetimi i aferës CEZ nuk varet fare nëse realizohet apo jo pyetja e sekserit Nuel Kalaj. Kallëzimi im është i plotë, me një përcaktim të qartë të asaj çfarë ka ndodhur, shkeljeve ligjore, dëmeve të pësuara si dhe personat përgjegjës.
Transaksionet bankare, implikojnë totalisht Nuel Kalajn, i cili përveçse ka kompromentuar totalisht procedurën e tenderimit, pasi asnjëherë nuk mund të këtë ndërmjetësime sekserimi përgjatë një procedure tenderimi, ka konsumuar gjithashtu edhe veprën penale të pastrimit të parave.
Roli i Nuel Kalajt është plotësisht i ditur tashmë, përderisa ai nuk u paraqit, për të dëshmuar përpara komisionit hetimor parlamentar, në fillim të vitit 2017, edhe pse fillimisht premtoi se do të dëshmonte”, tha ai. Romeo Kara i bëri thirrje prokurorisë që të mos druhet përballë ish-kryeministrit Sali Berisha. Sipas tij, edhe ai duhet të dalë para drejtësisë.
“Edhe pse përfshirja e ish kryeministrit Berisha është e qartë, e pakundërshtueshme në këtë aferë, prokuroria dhe politika nuk marrin guximin ta arrestojnë atë, duke cenuar tërësisht integritetin e procesit si dhe mbarëvajtjen e tij. Askush nuk do të vazhdojë seriozisht më tej me këtë proces përderisa Sali Berisha të jetë i lirë.
Ai sfidon i qetë, duke luajtur me riskun politik, mbarëvajtjen e këtij procesi si dhe çdo progres në vendosjen e drejtësisë. Duket sikur me ligj është saksionuar se: Sali Berisha nuk i nënshtrohet asnjë lloj drejtësie, se ligjet nuk janë bërë për t’u respektuar prej tij dhe organet ligjzbatuese nuk kanë asnjë tagër përkundrejt tij”, tha ai. Sipas juristit Kara, prokuroria dhe gjykata mund ta vazhdojnë procesin në mungesë të Nuel Kalajt, pasi procesi nuk mund të ngelë peng i vullnetit të tij.
“Procesi ka dalë tashme nga kulisat, është bërë plotësisht publik, faktet janë thënë e stërthënë, kështu që duhet parë e vërteta ne sy, duhet thënë e pranuar, se Saliut dhe bandës së tij të hajdutëve, iu ka ardhur dita, të japin hesap përpara drejtësisë dhe me arrestimin e tij, të fillojë realisht hapi i parë, i vendosjes së drejtësisë”, ka deklaruar Kara.
