Kuvendi i Shqipërisë është vënë ditën e djeshme në lëvizje për të mos lejuar mbylljen e dosjes për aferën e “CEZ”. Prokuroria pak ditë më parë ka kërkuar në gjykatë sërish zgjatje të afateve hetimore dhe dha sinjale se të gjithë të akuzuarit do t’ia hedhin paq. Shpresat e prokurorisë ishin tek gjetja e sekserit Nue Kalaj.
Por ky i fundit nuk po gjendet dhe për këtë arsye procesi mund të dështojë. Por dje është vënë në lëvizje Kuvendi për të mos lejuar diçka të tillë, pasi në prokurori u dorëzua padi ndaj ish-kryeministrit Berisha, djalit të tij dhe disa ish-ministrave të PD, pas hetimeve të zhvilluara nga një komision hetimor.
Padia e Kuvendit është bashkuar me atë të juristit Romeo Kara, pasi kanë të njëjtin objekt. Kështu që duke marrë shkas nga lëvizja e organit të akuzës, Kuvendi ka kërkuar dje informacione nga prokuroria sa i takon hetimeve për dosjen “CEZ”. Përmes një shkrese drejtuar drejtueses së Prokurorisë së Tiranës Elisabeta Imeraj, Kuvendi kërkon që përveç informacioneve të vihen në dispozicion kopje edhe dokumente sensitive të veçanta që organi i akuzës disponon. Po ashtu, në shkresën e tij Kuvendi bën me dije se kërkesa bazohet në faktin se periudha 3-mujore për zgjatjen e afatit të hetimeve ka përfunduar më datë 31 tetor të këtij viti.
Duke qenë se afati 3 mujor për zgjatjen e afatit të hetimeve i vendosur nga gjykata ka përfunduar më datë 31 tetor 2018, Kuvendi i Shqipërisë në cilësinë e palës së interesuar në këtë proces (kallëzues), mbështetur në nenin 105 të Kodit të Procedurës Penale, kërkon të na informoni në lidhje me stadin ku ndodhet hetimi i kësaj çështjeje si dhe të na vini në dispozicion kopje, ekstrakte ose vërtetime të akteve të veçanta që dispononi”, thuhet në shkresën e Kuvendit, drejtuar drejtueses së Prokurorisë së Rrethit Tiranë, Elisabeta Imerajt.
Pra, Kuvendi i Shqipërisë përmes kësaj shkrese kërkon që të nxisë prokurorinë që të zbardh aferën “CEZ”, në të cilën janë përfshirë ish-kryeministri Sali Berisha, djali i këtij të fundit dhe ish-ministrat e tij. Megjithatë, mbetet për t’u parë në ditët në vijim se çfarë do të ndodhë më konkretisht.
Hetimet për aferën “CEZ”
Dosja për zbardhjen e aferës “CEZ” vijon të jetë një patate e nxehtë në sirtarët e prokurorisë. Prej më shumë se një viti, në organin e akuzës janë bërë dy padi ndaj ish-qeverisë “Berisha” dhe funksionarëve të saj, për privatizimin e ish-OSSH nga CEZ. I pari ishte juristi Romeo Kara, ndërsa më pas një padi të ngjashme depozitoi Kuvendi, pas përfundimit të një hetimi parlamentar. Paditë u bashkuan, por puna ka ngecur.
Prokuroria i ka kërkuar gjykatës sërish zgjatje të hetimeve, pasi nuk po siguron provat e nevojshme ndaj të akuzuarve. Bëhet fjalë për dëshmitarin Nuel Kalaj. Prokuroria pasi kreu të gjitha verifikimet, lëshoi një fletëthirrje ndaj Nuel Kalajt, sekseri që vendosi lidhjen mes qeverisë së Sali Berishës dhe të çekëve të CEZ. Në padi pretendohet se marrëveshja ka qenë e jashtëligjshme dhe ai që ka më tepër dijeni është pikërisht Nuel Kalaj.
Prokuroria kërkon dëshminë e tij dhe duke qenë se ai është shtetas kosovar, më herët u kërkua ndihma e autoriteteve të Prishtinës. Por së fundmi prokuroria ka marr një përgjigje nga Kosova, ku thuhet se ata nuk po e gjejnë dot personin në fjalë. Edhe pse kanë thënë se do të vijojnë kërkimet, sinjalet janë se hetimet po dështojnë. /Rigels Seliman
