Ditën e djeshme u përmbush amaneti i fundit i shkrimtarit, publicistit, politikanit të shquar Mid’hat Frashëri. Eshtrat e tij erdhën nga ShBA dhe u varrosën pranë Frashëllinjve te Kodrat e Liqenit në Tiranë.
Ndërkohë, sjellja e eshtrave të tij në atdhe ka ndezur edhe një debat mes politikanëve, sa i takon pozicionimit të tij dhe Ballit Kombëtar, pasi një pjesë mendon se ishte bashkëpunëtor me nazifashizmin, ndërsa një pjesë tjetër të kundërtën.
Deputeti i PD, Agron Shehaj, i cili është edhe iniciator i kthimit të eshtrave të Frashërit në Shqipëri, përmes fondacionit “Lumo Skëndo” i themeluar bashkë me Uran Butkën, u përplas dje në emisionin ‘Top Show’ me historianin Mariglen Kasmi, lidhur me këtë debat.
Kasmi shprehet se Mid’hat Frashëri ishte bashkëpunëtor i gjermanëve, ndërsa deputeti Shehaj e kundërshton, duke thënë se ai po citon tekstet propagandistike të regjimit komunist.
Debati:
Mariglen Kasmi: Ardhja e gjermanëve në Shqipëri është shumë e qartë, për arsye ushtarake në radhë të parë, të bëjë një paqësim politik që të fitojë qetësinë dhe e fitoi sepse Balli Kombëtar ishte shumë e vlefshme dhe kontakti i parë mes tyre është që në 9 shtator. E thënë ndryshe, Balli Kombëtar punon në opsione të hapura dhe kulmi i këtij bashkëpunimi është operacioni i dimrit në 1944.
Agron Shehaj: Merr një tekst të historisë të botuar gjatë regjimit komunist është identik me atë që tha zotëria, asgjë më shumë e asgjë më pak. Nuk është serioze kjo nga ana e një historiani se tha një mal me budallaqe, që Balli Kombëtar ka bashkëpunuar, që Mid’hat Frashëri është tradhtar.
Ka qenë apo s’ka qenë bashkëpunues me nacifashistët?
S’mund ti japim përgjigje duke nxjerrë dokumente nga filma, pasi shqiptarët janë të pozicionuar. Një pjesë mendojnë se ai dhe Balli Kombëtar ka bashkëpunuar, një pjesë tjetër jo, ishte propagandë e regjimit komunistit. Jemi 30 vjet pas rënies së komunizmit, kemi një përgjigje për t’u dhënë shqiptarëve? Jo këtu në emision, ai ka për detyrë të thotë të vërtetën.
