Këshilli i Emërimeve në Drejtësi pritet të shkaktojë edhe një herë debat mes Kuvendit dhe Presidencës. Anëtarët e KED e kanë mandatin një-vjeçar dhe në dhjetor do të duhet të hidhet shorti për të zgjedhur anëtarët e rinj. Data 15 nëntor ishte afati i fundit kur të gjitha gjykatat dhe prokuroritë në vend do të duhet të dorëzonin në Presidencë listën e tyre me kandidatë për KED.
Më pas, presidenti Ilir Meta ka afat të hedhë shortin nga data 1 deri në 5 dhjetor ose këtë të drejtë t’ia delegojë Kuvendit. Në të gjitha herët, ka ndodhur kjo e fundit, pra shorti është hedhur nga Kuvendi sepse Presidenca është distancuar nga ky proces. Mirëpo teksa pritet që Ilir Meta të marrë një vendim për këtë procedurë, duhet theksuar fakti që deri tani janë bërë publike vetëm kandidaturat që Gjykata Kushtetuese ka dorëzuar në Presidencë për KED. Pak ditë më parë, Kushtetuesja njoftoi që kishte propozuar si anëtarë të KED Bashkim Deden dhe Vitore Tushën.
Për këtë të fundit pritet të ndizet edhe debati më i madh. Vitore Tusha momentalisht është anëtare e Gjykatës Kushtetuese, por i ka mbaruar mandati. Por fakti që Kushtetuesja e propozon si anëtare të KED do të thotë se e konsideron si gjyqtare në detyrë. Mirëpo në këtë mes futet edhe presidenti Ilir Meta dhe çështja e Kontrollit të Lartë të Shtetit, duke qenë se kreu i shtetit ka propozuar Tushën si kryetare të këtij organi.
Qoftë përmes një shkrese zyrtare dërguar Kuvendit, ashtu edhe publikisht, Meta ka deklaruar se Tusha në krye të KLSH nuk përbën asnjë pengesë sepse mandati i saj në Gjykatën Kushtetuese ka mbaruar. Në këtë pikë, Meta përplaset me Gjykatën Kushtetuese sepse sipas logjikës së tij, ky organ nuk duhet ta kishte propozuar Vitore Tushën për anëtare të KED. Për këtë çështje duhet të vendosë Kuvendi, i cili me shumë gjasë do të jetë edhe ai që do të kryejë procedurën e hedhjes së shortit për Këshillin e Emërimeve në Drejtësi.
Nëse Kuvendi e pranon propozimin e Gjykatës Kushtetuese për Vitore Tushën, atëherë bien poshtë pretendimet e Metës, duke shkaktuar kështu edhe një përplasje Kuvend-Presidencë. Në rast të kundërt, nëse shkon pas linjës së kreut të shtetit, Kuvendi mund të vendosë ta rrëzojë kandidaturën e Vitore Tushës për anëtare të KED.
Kandidati i Prokurorisë së Përgjithshme
Një tjetër çështje interesante është edhe ajo e kandidatit që Prokuroria e Përgjithshme ka dorëzuar për Këshillin e Emërimeve në Drejtësi. Pikërisht kjo çështje shkaktoi edhe një përplasje të fortë gjatë vitit të kaluar mes ish-ambasadorit amerikan, Donald Lu dhe ish-Prokurorit të Përgjithshëm, Adriatik Llalla.
Llalla propozoi vetëm një emër për anëtar të KED, atë të Rovena Gashit dhe kjo për Lu ishte shkelje Kushtetute sepse Kuvendi nuk kishte mundësi të zgjidhte. Llalla argumentoi asokohe se kishte propozuar vetëm Gashin sepse vetëm ajo i plotësonte të gjitha kriteret për të qenë pjesë e KED. Përtej përplasjeve, Rovena Gashi u bë anëtare e KED, por më pas ajo u shkarkua nga vetingu.
Duke qenë se emri i vetëm i cili sipas Llallës përmbushte të gjitha kriteret është përjashtuar nga sistemi i drejtësisë për 15 vite, tani mbetet të shihet se si do të veprojë kryeprokurorja e përkohshme Arta Marku.
Mister mbeten emrat që ajo ka propozuar nga Prokuroria e Përgjithshme për të qenë anëtarë të Këshillit të Emërimeve në Drejtësi. KED është një organ shumë i rëndësishëm, i cili vulos kandidatët për Gjykatën Kushtetuese dhe ata për Inspektoratin e Lartë të Drejtësisë. Pra, zgjidhja e ngërçit të Kushtetueses është në dorë të KED.
Mimoza Ibra
