Krerët më të lartë të politikës shqiptare pritet që të kalojnë në skaner për pasuritë. Një ditë më parë gazeta publikoi një urdhër të kryeprokurores Arta Marku, e cila ka kërkuar ngritjen e një njësie të posaçme, e cila do të verifikojë pasurinë e të gjithë personave të akuzuar për korrupsion dhe krim të organizuar.
Në skaner nuk do të kalojnë vetëm ata që janë aktualisht në proces hetimi, por dhe ata që janë gjykuar, kanë qenë në hetim dhe ata për të cilët janë pushur hetimet.
Por kush janë emrat që rrezikojnë? Gjatë kohës që prokuroria drejtohej nga Adriatik Llalla, pati padi ndaj shumë zyrtarëve të lartë, por të gjithë ja hodhën paq.
Por tani të gjithë këta do të verifikohen për pasuritë. Sipas të dhënave, rezulton se të rrezikuar janë edhe presidenti Ilir Meta, ish-kryeministri Sali Berisha, kreu i opozitës Lulzim Basha, shumë deputetë, ministra e ish-ministra.
Në urdhrin e kryeprokurores bëhet e ditur se do të nisë hetimi pasuror për të gjitha ata zyrtarë që janë akuzuar për afera të ndryshme korrupsioni, shpërdorim detyre, fshehje pasurie, abuzime me tenderat dhe një sërë veprash të tjera penale që kanë të bëjnë po me korrupsionin.
Nëse i marrim me radhë emrat, ndaj presidentit Ilir Meta ka dy hetime. I pari është gjatë kohës që ai ishte ministër i Energjisë, ku u akuzua nga Dritan Prifti për korrupsion. Pra bëhet falë për videon e famshme, por që kreu i shtetit doli i pafajshëm.
Ndërsa akuza e dytë ka të bëjë me çështjen CEZ-DIA. Ndaj tij ka një padi nga juristi Romeo Kara. Sa i takon Berishës, ai është nën hetim momentalisht për “shpërdorim detyre” mbi bazë të dy padive që ka bërë po juristi Romeo Kara.
Në një padi ai akuzohet për shpërdorim detyre sa i takon privatizimit të ish-OSSH, ndërsa në padinë e dytë akuzohet për paktin me DIA. Sa i takon Bashës, ndaj tij ka shumë akuza për shpërdorim detyre. E para është rruga Durrës-Kukës, ku ai i shpëtoi drejtësisë.
E dyta është shitja e detit, ndërsa e treta ka të bëjë me lejet e dhëna kur ishte kryetar bashkie. Për të tre këto raste ai është hetuar dhe hetimet janë pushuar. Por sipas dokumentit të lëshuar nga Marku dhe për këto raste do ketë hetime.
Ish-ministrat e PD
Nëse vërtet kryeprokurorja do të nisë një hetim pasuror për të gjithë emrat e akuzuar për korrupsion, pa marrë fare parasysh nëse janë dënuar, gjykuar apo u janë pushur hetimet, më të rrezikuar janë padyshim shumë ish-funksionarë të PD.
Shumë ish-ministra të Berishës janë kallëzuar në prokurori për shumë skandale. Këtu mund të përmenden Ridvan Bode dhe Sherefedin Shehu. Të dy të kallëzuar për skandalin me rrugën Durrës-Kukës, pasi morën kredi me interes shumë më të lartë se normalja.
Edhe në këtë rast të gjithë ja hodhën paq. Një tjetër rast është privatizimi i OSSH. Ministria e Energjisë paditi disa zyrtarë, mes të cilëve Genc Rulin e Florion Mimën, por çështja u pushua.
Rasti tjetër më flagrant është ai i Arben Imamit. Ai u padit 4 herë në prokurori dhe të katërta herët ja hodhi paq, edhe pse pati akuza për abuzime me tendera dhe me pajisjen e përgjimit.
Verifikimet
Në urdhrin e kryeprokurores bëhet e qartë se do të nisë verifikimi pasuror për të gjithë personat në vend të akuzuar për veprat penale të fushës së korrupsionit dhe ato të lidhura me krimin e organizuar.
Gjatë procesit të vetingut në drejtësi është vënë re se në shumë pak raste hetimet për korrupsion dhe ndaj bandave janë shoqëruar me verifikim pasuror. Për këtë arsye të gjithë ata që janë dënuar dhe nuk u është hetuar pasuria, por dhe ata që thjesht kanë qenë në hetim dhe u është mbyllur dosja, do verifikohen për pasurinë.
Nëse ajo nuk justifikohet, atëherë kërkohet sekuestro dhe me shumë gjasë rihapen hetimet. Kjo do të thotë se shumë dosje të bujshme korrupsioni që janë mbyllur ndër vite mund të rihapen vetëm përmes faktit se të akuzuarit nuk justifikojnë pasurinë. Dhe nëse ndodh kjo, lista e emrave që mund ta pësojnë është e madhe./Sot
