Operatori i dytë më i madh i telekomunikacionit në vend, “Telekom Albania”, është në prag të shitjes tek kompania bullgare “Vivacom”, sipas burimeve konfidenciale nga “OTE Group”, në Greqi. Kjo shitje mendohet se do të realizohet brenda muajit Janar 2019.
Prej disa muajsh, në garë për të blerë Telekom Albania kanë qenë tre – katër kandidatë. Por me sa duket, bazuar nga burimet, së fundmi është realizuar një marrëveshje që kompania të blihet nga “Vivacom”, edhe pse në garën e “më të fortëve”, ishte operatori tjetër bullgar “Globul Telenor”, manjati grek i naftës dhe transporteve Vardis Vardinogiannis, si dhe serbët e “Telekom Serbja”.
Nga burime konfidenciale, pretendentët kryesorë për ta blerë Telekom Albania ka qenë dhe Albtelecom, operatori i tretë më i madh në vend. Siç duket të gjithë blerësit e tjerë potencial janë tërhequr nga gara dhe kompania tashmë e ka blerësin e saj.
Por, me një kërkim të thjeshtë në motorët e kërkimit online për “Vivacom”, rezulton se kompania bullgare zotërohet nga biznesmeni Spas Rusev, i cili dyshohet nga mediat ndërkombëtare se bisnesi i tij ka lidhje të dyshimta me aktivitet kriminal. (Burimi Wikileaks)
A po hyjnë në Shqipëri financime ruse, përmes këtij transaksioni?
Historiku i kompanisë
Kompania greke Cosmote bleu në vitin 2000 Albania Mobile Communication (AMC) të krijuar nga shteti në vitin 1995 për një shumë prej 120 milionë euro.
Në vitet e para të aktivitetit normat e fitimit i kalonin mbi 50% teksa deri në vitin 2009 në treg kishte vetëm dy operatorë (AMC dhe Vodafone, që hyri në vitin 2003) që operonin në një treg duopol.
Në korrik 2015 AMC prezantoi identitetin e ri të saj, duke u quajtur Telekom Albania, pas bashkimit me rrjetin gjerman të telekomunikacionit, Deutsche Telecom, përmes mëmës së saj në Greqi.
