Gazetarja e BIRN, Aleksandra Bogdani, e ftuar në emisionin “Opinion”, ka deklaruar se ka prova që pas kompanisë DH Albania, e cila falsifikoi dokumentat për të fituar lotin e parë të tenderit të Unazës së Re, është biznesmeni i njohur Bashkim Ulaj dhe kompania e tij Gener 2.
Bogdani u shpreh se në QKB janë bërë veprime nga punonjës të Gener 2, në emër të kompanisë DH Albania. Konkretisht një prej mandateve të pagesës mban emërtimin ” aplikim Gener 2″ dhe është bërë nga punonjëse e kësaj kompanie.
“Kompania DH Albania ka bërë tre veprime që prej themelimit të saj në QKB. Veprimi i parë ka qenë regjistrimi, ku janë futur dokumentat e falsifikuara. Veprimi i dytë është zhvendosja e kompanisë në Aba Centre. Ndërsa veprimi i tretë, është regjistrimi i një NIPT-I sekondar, pranë kantierit të punimit. Ky veprimi është bërë nga një punonjëse e Gener 2, e autorizuar nga Avdjol Dobi. Tek aplikimi, nuk është shkruar DH Albania, por Gener 2. Përse duhet vendosur emri i Gener2? Është paguar nga Gener 2″, është shprehur Bogdani.
Gazetarja Bogdani, në një shkrim në Reporter.al, gjithashtu shpjegonte se disa persona pranë zotit Ulaj, kanë bërë veprime për kompaninë.
Por drejtori i ARRSH-së, Afrim Qendro, u shpreh se nuk ka dijeni për këtë fakt dhe se nuk është në tagrin e tij ligjor të ketë informacion lidhur me këto veprime.
“Unë nuk hetoj kush i kryen veprimet dhe a është punonjëse e Gener 2. A jam unë në dijeni që Gener 2 është pas kësaj kompanie? Në dijeninë time, në dokumentat zyrtarë që është praqitur pranë Autoritetit Rrugor, nuk më del ndonjë lidhje me kompaninë Gener2“, u shpreh Qendro.
Por, ky nuk ishte i vetmi fakti i panjohur për zotin Qendro, i cili bëri të paditurin thuajse për të gjitha faktet që tashmë janë zbuluar lidhur me kompaninë. Qendro tha se nuk kishte asnjë dyshim të arsyeshëm për kompaninë DH Albania dhe se ai nuk kishte asnjë detyrim ligjor të bënte verifikime, edhe pse pranë ARRSH-së, ishte paraqitur një 26 vjeçar dhe një kompani e panjohur në Shqipëri.
