Ndryshimet në qeveri rrezikojnë të rikthehen në mollë sherri mes kryeministrit Edi Rama dhe presidentit Ilir Meta. Të premten në mbrëmje shefi i qeverisë ka dorëzuar në Presidencë propozimet për emërimin e ministrave të rinj dhe dje ka ardhur reagimi i parë i kreut të shtetit. Ilir Meta ka dekretuar dje shkarkimin e 7 prej ministrave aktualë dhe emërimin e 4 emrave të rinj, përfshirë dhe zv/kryeministrin. Ajo që bie në sy është se Meta ka bllokuar shkarkimin e Ditmir Bushatit nga posti i Ministrit të Jashtëm.
Një ditë më parë gazeta e deklaroi se propozimi i Ramës për të emëruar Gent Cakën në këtë post është “Thembra e Akilit” e ndryshimeve të reja. Burime të sigurta të gazetës mësuan nga Presidenca se Meta ka nisur një proces verifikimi për të gjithë emrat që nuk kanë mandat deputeti. Por vëmendja më e madhe është përqendruar te Caka. Ai është propozuar për ministër të Jashtëm dhe fakti që Meta ka bllokuar dhe shkarkimin e Bushatit, tregon se Presidentit nuk është shumë i bindur për emrin e ri.
Gazeta ka mësuar se Meta po konsultohet me këshilltarë dhe ekspertë të diplomacisë dhe po ashtu, po kërkon informacione të shumta për Cakën. Nuk është çudi që Meta të ndjekë të njëjtin shembull si me Sandër Lleshajn, kur e refuzoi herën e parë me argumentin se nuk ishte i bindur për të. PD e ka sulmuar fort Cakën dhe i ka kërkuar Metës të mos e dekretojë, pasi ai është kosovar dhe nuk ka karrierë të gjatë në diplomaci. Megjithatë mbetet të shihet se çfarë do të bëjë Meta, i cili ka fat deri ditën e premte në mesnatë të vendosë për emrat e mbetur pezull.
Dekret e Metës
Presidenti Ilir Meta ka dekretuar dje shkarkimin e të gjithë ministrave të tjerë përveç Bushatit. Në këtë mënyrë, ai ka firmosur shkarkimin e Lindita Nikollës në postin e ministres së Arsimit, Mirela Kumbaros si ministre Kulture, Damian Gjiknurit si ministër të Transportit, Arben Ahmetajt si ministër të Financës, Niko Peleshit si ministër Bujqësie, Sonila Qatos si ministre për Sipërmarrjen dhe të zv/kryeministres Senida Mesi. Po ashtu, Meta dje ka firmosur emërimin e Eduard Shalsit në postin e ministrit të Sipërmarrjes, emërimin e Bledi Çuçit në postin e ministrit të Bujqësisë, emërimin e Elisa Spiropalit ministre për Marrëdhëniet me Parlamentin dhe po ashtu ka firmosur emërimin e Erion Braçes në postin e zv/kryeministrit.
Duke qenë se 4 emrat e mësipërm kanë mandat deputeti, Meta ka firmosur direkt emërimet, pasi ata plotësojnë të gjitha kushtet e nevojshme. Por ai ka nisur procesin e verifikimeve për: Besa Shahinin, Gent Cakën, Anila Denajn, Elva Margaritin dhe Belinda Ballukun. Për këtë emër është kërkuar informacion nga SHISH, prokuroria, DSIK dhe institucione të tjera. Sapo të vijnë përgjigjet, Meta do të vendosë nëse do i dekretojë apo jo. Por sinjalet janë se përveç Cakës, të gjithë të tjerët do dekretohen.
Caka me shumë gjasë mund të kthehet në një mollë sherri mes Ramës dhe Metës. Rasti i Lleshajt tregoi se mes tyre ka shumë tension, por ditë e fundit situata sikur u qetësua. Por nëse Meta bllokon një tjetër ministër, kjo do të shënojë dhe një luftë të hapur mes qeverisë e Presidencës. Meta kohët fundit është rreshtuar disa herë krah opozitës. Nëse ai e dëgjon sërish atë për refuzimin e Cakës, atëherë do rrisë bindjet se po ndihmon Bashën e Kryemadhin për të goditur qeverinë,. Megjithatë mbete të shihet deri javën që vjen. Ndërkohë, PS pritet të thërrasë në seancë të jashtëzakonshme Parlamentin, për shkak se dekret e Metës duhet të miratohen brenda 10 ditëve.
Kliti Topalli
