Sot ndodhi një ngjarje dramatike. Në Konventën e LSI, Monika u bëri thirrjeve burrave dhe grave të LSI, të sakrifikojnë dhe jetën për të rrëzuar Ramën nga pushteti, në emër të fëmijëve tanë.
Në këtë moment, njërës prej zyrtareve të LSI, Nora Malaj, i rrëshqitën dy lotë në faqe.
Jari, që po ndiqte me vëmendje Konventën, vendosi të bëjë një letër të hapur për Norën dhe lotët e saj:
“Të dashur demokratë!
Jari ju sqaron!
Ata dy pika lot që rrëshqitën sot në faqet e Nora Malaj, pasi dëgjoi fjalimin frymëzues të Monikës për luftën kundër Edi Ramës, janë dy pika kristali ku pasqyrohet pastërtia e opozitës dhe forca e vërtetë e saj.
Aty brenda atyre pikave loti, janë të gjallët dhe të rënët e këtij vendi, fuqia dhe trimëria jonë, shpresa dhe ëndrrat për të nesërmen.
Ato dy pika rrëshqitën mbi faqe jo si shenjë dobësie, por si shenjë përbetimi për një luftë të gjatë e të pafundme ndaj diktaturës.
Brenda atyre dy pikave loti, është nostalgjia për kohën kur Nora ka qeverisur me pastërti, kur bëhej Doktore shkencash tek Kristali, kur firmoste licenca universitetesh, dhe punonte 24 orë në çdo televizon, që nga emisioni i mëngjesit, deri tek ato të pasmesnatës.
Brenda atyre dy pikave lot, është dhe dëshpërimi i opozitës që nuk po mund t’ia dalë dot regjimit të narkotrafikut të Edi Ramës.
Ndaj ne duhet të përulemi para atyre dy pikave loti.
Ka plot njerëz që mendojnë nga ana tjetër se Nora qau nga frika se Monika bëri thirrje për luftë.
Kurrën e kurrës. Ajo jo vetëm që nuk i trembet luftës, por mezi pret të shkojë në luftë.
Por frika e saj është se LSI shpesh i lë luftërat në mes.
Lotët e sinqertë të asaj gruaja na bëjnë thirrje në ndërgjegjien tone, të mos lejojmë tradhtarin Gent Caka të bëhet ministër.
Ato janë një thirrje që të mos pranojmë kompromise dhe të devijojmë nga ideali ynë.
Lotët e asaj gruaja janë lotët e çdo shqiptari të ndershëm, që lutet çdo natë në vatër kundër varfërisë e mjerimit.
Frika e atyre lotëve është se mos LSI e lë në mes ëndrrën për të rëzuar Edi Ramën.
Ndaj ne i bëjmë thirrje sot Norës dhe gjithë atyre grave që u përlotën, ta ngrejnë kokën se nuk janë vetëm.
Fshiji lotët se kemi ende Lulin gjallë, dhe askush nuk shkel dot mbi idealet e opozitës.
I juaji, Jari!”
