Shkencërisht është provuar se sa më tepër vite të kalojnë, aq më shumë i shtohet cilësia verës. Femrat janë po njësoj si vera. Sa më tepër vite të kalojnë, aq më të mira bëhen ato. Me kalimin e kohës, edhe tek femrat fillojnë të shfaqen rrudhat dhe elasticiteti i lëkurës fillon të bjerë në të gjithë trupin. Por ato rrudha tregojnë gjithë vitet që mban mbi supe një femër. Ato rrudha tregojnë vuajtjet e sakrificat e saj, dhe janë një dëshmi e gjithë forcës që ajo ka grumbulluar në vite për të qëndruar sërish e fortë në pleqëri.
Me kalimin e viteve një femër siguron mjaftueshëm përvoja, saqë kur arrin një moment, nuk rrëzohet nga asgjë dhe nga askush. Forca dhe siguria e bëjnë atë më të bukur se më parë. E tranformojnë atë në një femër stoike përpara gjithçkaje dhe e gjithë forca e saj është bukuri në sytë e kujtdo.
Një femër me kalimin e viteve bëhet nënë dhe përjeton dashurinë për fëmijët e saj. Kjo dashuri reflektohet edhe në mënyrën, se si një femër i trajton fëmijët e tjerë apo edhe gjithë njerëzit e tjerë. Një femër e dashur është padiskutim më e bukur. Bukurinë ia jep dashuria dhe mënyra e përzemërt se si i trajton të tjerët.
Me kalimin e viteve një femër mund të preket nga sëmundje të ndryshme, por sytë e saj do të jenë përherë të njëjtët. Ato do të reflektojnë gjithë vuajtjet dhe lumturitë që ajo ka kaluar përgjatë jetës. Sytë do të jenë pasqyra e gjithë rrugëtimit të saj drejt forcës ekstreme në pleqëri.
Një femër e moshuar është edhe më e bukur, sepse është më e mençur. Përvojat e bëjnë atë më të matur, më të kujdesshme, më të mprehtë në mendime. Inteligjenca përkthehet me bukuri. Bukuria nuk qëndron tek një trup me forma, apo një fytyrë perfekte, të cilat perceptohen subjektivisht nga çdo individ. Bukuria qëndron tek mendja e bukur, e cila të bën për vete dhe një mendje e bukur nuk ka pse vlerësohet me subjektivizma. Ajo për këdo është e bukur. Kështu është edhe mendja e një femre me kalimin e viteve.
Një femër me kalimin e viteve merr rrugëtimin e pandalshëm drejt bukurisë. Ajo bëhet përherë e më e bukur, më e dashur dhe më e matur në veprimet dhe fjalët e saj. Një femër me sa më shumë vite mbi supe bëhet shumë më tërheqëse për mendjen se sa për trupin e saj, dhe një femër e tillë konsiderohet padyshim më e bukur. Vetëm me moshimin e një femre ne arrijmë ta kuptojmë vërtet se çfarë do të thotë bukuri…
