Supertrafikanti i Ballkanit kishte në dorë tërë fijet ligjzbatuese të shtetit, duke filluar që nga ministria e Brendshme, Prokuroria e deri tek Ministria e Bujqësisë. Klemend Balili kishte një mbështetje të fortë nga ana e qeverisë së Berishës, dhe me ardhjen e të majtës në pushtet garantoi mbështetjen e qeverisë së Ramës, përmes aleatit kryesor në qeverisje, ish kreut të LSI, Ilir Meta, duke u bërë tërësisht i paprekshëm. Një mbështetje që ishte përtej zbatimit të ligjit, aq sa me kërkesën e Metës sakrifikuan ish kreun e bashkisë së Sarandës, Stefan Çipa, përfaqësues i PS i cili ishte kundër zgjerimit të pronave të Klemend Balilit dhe që si ndëshkim përjashtohet nga kandidimi për një mandat të dytë në bashkinë e Sarandës. Në skenë del Adriatik Llalla që e detyron të tërheqë dhe padinë ndaj Balilit. Ish kryeporokurori i jep supertrafikantit të drogës në “dorë” Prokurorinë e Sarandës e Gjirokastrës, të cilat lidhën kontratë me kompaninë e Balilajve që të ruajnë godinat e institucioneve. Balili mori dhe nga ish ministri i Brendshëm Lulzim Basha më 2010 si dhuratë tokën ku ndërtoi resortin turistik dhe nga ministri i Bujqësisë Edmond Panariti më 2016 mori me qira qindra hektarë tokë
Klemend Balili nuk ka qënë thjeshtë një financues i fushatës së LSI e mik për kokë i Ilir Metës, i cili e nderoi duke prerë shiritin në përurimin e resortit turistik “Santa Quaranta” në Sarandë.
Supertrafikanti i Ballkanit ishte më shumë se kaq, pasi kishte në dorë tërë fijet ligjzbatuese të shtetit, duke filluar që nga ministria e Brendshme, Prokuroria e deri tek Ministria e Bujqësisë.
Pas dorëzimit në duart e policisët dhe në pritje të fillimit të procesit gjyqësor, po dalin detaje të reja e kompromentuese të lidhjeve të Klemend Balilit me figura të tjera të rëndësishme politike.
Shumëkush ishte habitur me paprekshmërinë e tij, por fakt është se ai kishte një mbështetje të fortë nga ana e qeverisë së Berishës në atë kohë, por dhe me ardhjen e të majtës në pushtet garantoi mbështetjen e qeverisë së Ramës, përmes aleatit kryesor në qeverisje, ish kreut të LSI, Ilir Meta, duke u bërë tërësisht i paprekshëm.
Një mbështetje që ishte përtej zbatimit të ligjit, aq sa e sakrifikuan dhe ish kreun e bashkisë së Sarandës, Stefan Çipa, përfaqësues i PS, i cili ishte kundër zgjerimit të pronave të Balilit.
Madje ndëshkimi ndaj tij me kërkesën e Metës arriti përtej të pamendueshmes, përjashtohet nga kandidimi për një mandat të dytë në bashkinë e Sarandës pikërisht Çipa, njeriu që kishte risjellë PS në pushtetin vendor në Sarandë, por që kishte bërë një gabim: i ishte kundërvënë Balilit.
Më 5 mars 2014, një vit para zgjedhjeve vendore të radhës, ish-kryebashkiaku i Sarandës, sot Drejtor i Përgjithëm i Burgjeve, Stefan Çipa denoncoi Balilin për zgjerimin e kompleksit “Santa Quaranta” me park, kënd lojërash dhe mol për skafet.
Denoncimi erdhi sepse Klemend Balili kishte zaptuar forcërisht hapësira publike e sipërfaqe detare. Por nuk ishte i këtij mendimi prokurori, që me urdhër të Adriatik Llallës, i kërkoi kryebashkiakut të tërhiqte denoncimin duke e kërcënuar me raportin e KLSH për bashkinë.
Në skenë del gjithnjë e më shumë emri i Adriatik Llallës, ish Kryeprokurorit, duke bërë që bashkë me Balilin të jenë të dy pjesë e të njejtës skemë korrupsioni dhe krimi, kuptohet me bekim e shefave të tyre të mëdhenj politikë.
Ish Kryeprokurori miliarder Adriatik Llalla, nuk bën ndere badihava për të shpëtuar Balilët, megjithëse i ka “dorovitur” dhe me para të thata, direkt nga financat e Prokurorisë. Kështu, nga Llalla, Balili mori në “dorë” dhe Prokurorinë e Sarandës dhe Gjirokastrës, të cilat kanë lidhur kontratë me kompaninë e Balilajve që të ruajnë godinat e institucioneve.
Pra, përpos faktit që nuk hetuan dhe bënë punën siç duhet për të bërë drejtësi, i lanë pallatin e drejtësisë në ruajtje atij që kishin në kërkim. Kompania mund të ketë edhe aksionerë të tjerë, por që prokuroria, t’i japë ruajtjen e vetes atij që ka nën hetim, vetëm në Shqipëri ndodh.
Por ish-zyrtari i Metës në Sarandë Klemend Balili kishte kohë që bënë pazare me politikën shqiptare, pasi mori dhuratë dhe nga Basha në 2010 tokën ku ndërtoi resortin turistik dhe nga ministri i Bujqësisë Edmond Panariti më 2016 mori me qira qindra hektarë tokë.
Sipas dokumentave, në qershor 2010, në kohën kur Basha ishte ministër i Brendshëm, urdhëroi që ish-kampit të punëtorëve dhe pionerëve në Sarandë t’i hiqej nga pronësia sindikatës, për t’iu dhuruar Balilit, ku sot është është Santa Quaranta.
Pra po dalin një nga një të gjithë njerëzit e lidhur me Balilin, ata që i dhanë para, pasuri të luajtshme dhe të palujtshme, si dhe siguri për të zhvilluar aktivitetin e tij kriminal. “Trinomi” Basha-Llalla-Panariti, të mbështetur fort nga Berisha dhe Meta garantuan aktivitetin kriminal të Klemend Balilit dhe tashmë pritet të jenë të gjithë para drejtësisë, të trembur fort nga dëshmia e supertrafikantit të Ballkanit./Pamfleti/
