Bllokimi i fakulteteve në disa universitete të vendit ka futur në sherr studentët. Prej kohësh Universiteti i Drejtësisë vijon të ngelet i bllokuar nga një grup i vogël studentësh, të cilët pengojnë pjesën më të madhe për të zhvilluar mësim.
Shumica e tyre paraqitet çdo ditë pranë fakulteteve për tu paraqitur në auditorë, por nuk lejohen nga studentët e tjerë. Ata janë të shqetësuar nga mungesa e mësimit, në prag të provimeve të cilat mbahen në muajin shkurt. Një pjesë e studentëve i është drejtuar rektorit të Universitetit të Tiranës për të zhbllokuar ambientet e universiteteve, pasi rrezikojnë të humbasin vitin akademik.
Shqetësues mbetet fakti se ata që po pengojnë procesin e mësimit janë militantët e opozitës, nga PD dhe LSI, konkretisht sekretarja e Marrëdhënieve me Publikun ne LSI e njëherësh, koordinatore e forumit rinor të LRI për gjimnazet dhe Sekretari i FRPD për Fierin. Rektori Mynyr Koni ende nuk po merr një vendim për të zhbllokuar ambientet e universiteteve, duke u bërë palë me opozitën, dhe duke dalë me një kauzë kundra qeverisë. Senati akademik i Universitetit të Tiranës u shpreh një ditë më parë se veprimi i rektorit, që është bërë një me opozitën është shkelje flagrante e ligjit, përveç se po del kundra të drejtave të studentëve dhe familjeve shqiptare.
Studentët e Universitetit të Drejtësisë vazhdojnë që në dhjetor të vitit të kaluar që nuk po zhvillojnë mësim, duke rrezikuar humbjen e vitit akademik. Ata kërkojnë nga ana e qeverisë rrëzimin e ligjit të arsimit të lartë, duke u mbështetur edhe nga pedagogët e tyre.
Pedagogët iu mbyllin gojën studentëve
Një nga pikat e protestës së studentëve ka qenë edhe vetingu i pedagogëve. Gjatë protestës që ata zhvilluan në dhjetor të vitit të kaluar, bënë publik disa emra pedagogësh që ishin të korruptuar, duke denigruar figurën e tyre. dje u mblodh Asambleja e Pedagogëve, të cilët morën 6 vendime, por pika 5 ka revoltuar së tepërmin studentët. “Ndalimi i fushatës denigruese të figurës së pedagogut si dhe miratimin e statusit të pedagogut”, ka qenë vendimi i dalë nga asambleja, ku pedagogët kanë kërkuar që studentët të mos bëjnë publik emrat e tyre.
Ajo që bie në sy është se në këtë Asamble ka pedagogë që janë pjesë e PD dhe LSI dhe mbështetës të Berishës dhe Kryemadhit. Pra përveç studentëve të infiltruar, Berisha-Kryemadhi po përdorin pedagogët për të bllokuar fakultetet. Studentët e kanë konsideruar si veprim të turpshëm që ata kërkojnë tu mbyllin gojën, duke shtuar se ata nuk e dinë kush i ka hartuar pikat.
Studentët janë shprehur se kanë frik nga ata dhe nga vetingu. “Nuk e dimë kush i ka hartuar, por duket qartë që kanë frikë nga studentët. Me pak fjalë studenti nuk duhet të flasë për Pedagogun. E turpshme”, janë shprehur studentët mbas publikimit të pikës 5 nga mbledhja e Asamblesë së Universitetit të Tiranës. Nga ane tyre pedagogët i kanë vendosur një ultimatum një javor qeverisë për ndryshimin e Ligjit të Arsimit të Lartë ose në të kundërt ata do bojkotojnë mësimin.
Asambleja e Pedagogëve, e udhëhequr nga pedagogë të Fakultetit të Shkencave Sociale dhe të Histori Filologjisë si Mark Marku, Rezart Prifti të cilët janë aktivistë të PD dhe Jani Marka dhe Arlind Qorri, të cilët janë përfaqësues të Lëvizjes për Universitetin, parashtruan pesë kërkesa drejtuar qeverisë, ku pika që ata vinin në dukje ishte ndryshimin e Ligjit të Arsimit të Lartë. Afati i vendosur nga pedagogët për qeverinë është data 1 shkurt. Në të kundërt ata paralajmëruan bojkotimin e procesit mësimor.
Elisjeda Kiko
