Ngritja e bazës ushtarake të NATO-s në Kuçovë duket se ka për qëllim kryesor zmbrapsjen e rusëve nga rajoni. Këtë e ka zbuluar gazeta e ushtrisë amerikane ‘Stars and Stripes’, e cila i ka kushtuar një shkrim lajmit të bujshëm se NATO ka nisur punën për ngritjen e një baze ajrore në Shqipëri.
Gazeta thekson se qëllimi i ngritjes së kësaj baze është pikërisht kundërvënia ndaj influencës ruse në rajon.
“NATO pritet të zgjerojë prezencën në Ballkan- ku Perëndimi dhe Rusia janë ngërthyer në një betejë për ndikim- ndërsa Shqipëria përgatitet për të pritur të parën bazë ushtarake të aleancës në rajon. Zyrtarët shqiptarë dhe amerikanë shënuan të enjten nisjen e fazës së parë të projektit prej 58 milionë euro për modernizimin e bazës ajrore të Kuçovës në qendër të Shqipërisë, në mënyrë që ajo të jetë në përputhje me standardet e NATO-s”, thuhet në shkrim.
Në shkrim, theksohet gjithashtu se Shqipëria nuk ka avionët e saj dhe se prej vitit 2009 kur u bë pjesë e Aleancës, hapësira ajrore është monitoruar nga Italia dhe Greqia.
Më tej, thuhet se investimi erdhi pasi ministrja e Mbrojtjes, Olta Xhaçka, bëri një vizitë në Pentagon, ku kërkoi ngritjen e një baze të SHBA ose të NATOs në rajon për t’iu kundërvënë ndikimit rus, por edhe interesave të vendeve si Kina dhe Irani.
“Rajoni ka qenë sheshbeteje për ndikim mes Perëndimit dhe Rusisë, e cila ka kritikuar lëvizjet për të zgjeruar anëtarësimin e NATO-s në këtë rajon, duke theksuar se kërcënon sigurinë rajonale”, vijon më tej shkrimi i gazetës amerikane.
