Mazhoranca ka kërkuar nga prokuroria që t’i japë fund zvarritjes së hetimeve për aferën e CEZ. Prej afro 1 viti e gjysmë në organin e akuzës ndodhen dy kallëzime penale, mbi abuzimet që janë bërë për privatizimin e ish-OSSH. Të kallëzuar janë Sali Berisha, djali i tij apo dhe shumë ish ministra të PD. Por deri më sot, prokuroria ka zvarritur hetimet dhe kjo ka sjellë dje reagimin e deputetëve socialistë. Pas mbledhjes së Konferecës së Kryetarëve, ku u diskutua mbi komisionet hetimore, kreu i grupit parlamentar të PS, Taulant Balla tha se komisioni për CEZ është i vetmi që ka patur sukses. Por sipas tij, pengesë po bëhet prokuroria.
“Është dita sot që t’i drejtohem prokurorisë pasi janë bërë më shumë se 18 muaj që kemi depozituar një kallëzim penal në emër të Kuvendit të Shqipërisë përkundrejt një numër shtetasish duke filluar nga Sali Berisha dhe ish-funksionarë të lartë apo persona të lidhur me ta, lidhur me një prej skandaleve më të mëdha në gjithë këto vite të procesit të privatizimit të Kompanisë OSSH, më pas të prishjes së kontratës me kompaninë CEZ e cila i ka kushtuar shqiptarëve disa qindra milionë euro. Pas 18 muajsh, prokuroria duhet të heqë dorë nga historia që hetimet tejkalojnë afatet, sepse shqiptarët e kujtojnë mirë një hetim të ngjashëm, i cili nuk u referua në gjykatë, por u bllokua për shkak të shkeljes së afateve”, tha Balla.
Komision të ri hetimor për drogën
Dje në Konferencën e Kryetarëve mazhoranca ka hedhur poshtë kërkesën e Partisë Demokratike për të shtyrë afatin e komisionit hetimor për çështjen “Tahiri”. Balla rrëzoi pretendimet e opozitës se institucionet nuk kanë paraqitur dokumentacionin për komisionin e çështjes “Tahiri”. Ai tha se vetë opozita nuk ka kërkuar prej disa muajsh mbledhjen e komisionit. Balla u shpreh se personat të cilëve u vihet në dispozicion informacione të klasifikuara, duhet të jenë të pajisur me certifikatë sigurie.
“Nuk është e vërtetë që komisionit nuk i është në dispozicion dokumentacion. nga informacioni që u dha nga nënkryetarja e Komisionit, Felaj u shpreh qartë se kemi të bëjmë me një mungesë serioziteti nga ana e kërkuesve të Komisionit, të cilët nuk kanë kërkuar prej muajsh që të mblidhet Komisioni. Duhet të jetë e qartë për këdo, edhe për Komisionin Hetimor që ngrihet nesër, se ligji për administrimin e informacionit të klasifikuar dhe të detyrimit që personat, të cilëve u vihet në dispozicion informacion i klasifikuar, të jenë të pajisur me certifikatë sigurie, është gjithmonë i domosdoshëm”, u shpreh Balla.
Reagimi i PD
Por hetimet për çështjen “Tahiri” kanë sjellë edhe reagimin e PD. Nënkryetari i PD, Edi Paloka tha se komisioni hetimor do të ngrihet nga e para. Ai u shpreh se kjo çështje do të vazhdojë të zvarritet, pasi kryeministri Rama nuk do të demaskohen lidhjet e qeverisë me drogën, aq më pak kur Ministrinë e Brendshme e drejtonte vetë Tahiri. “Komisioni do të ringrihet dhe kësaj pune do t’i shkojmë deri në fund, sado të përpiqen ta pengojnë. Ka vetëm një qëllim, edhe pse Ruçi ju tërhoqi vërejtje formalisht institucioneve dhe iu drejtua të deleguarës të radhës ministres Spiropali që institucionet t’i përgjigjen Parlamentit.
Jam i bindur që kjo histori do të vazhdojë kështu sepse nuk mundet as Rama dhe askush tjetër të demaskohen për lidhet që kjo qeveri ka direkt me krimin dhe drogën, sidomos gjatë kohës kur ministrinë e Brendshme e drejtonte Saimir Tahiri”, tha Paloka.
Elisjeda Kiko
