Debati për dosjet e Sigurimit të Shtetit është ndezur sërish. Rasti i anëtarit të Këshillit të Lartë të Prokurorisë, Bujar Sheshi, i cili nga përgjigja e Autoritetit të Dosjeve rezultoi se është rekrutuar nga Sigurimi i Shtetit në moshë të mitur, bëri që vëmendja të përqendrohet tek ata emra që dikur kanë qenë sigurimsa. Por pyetja që lind natyrshëm është: A ka emra të tjerë të njohur që dikur kanë qenë bashkëpunëtorë të ish-Sigurimit të Shtetit?
Për t’i dhënë përgjigje kësaj pyetje, gazeta “SOT” kontaktoi dje me Viron Bezhanin, i biri i Nazif Bezhanit, i cili ka qenë kryetar i Komisionit për Pastërtinë e Figurave në kohën e ish-kryeministrit Fatos Nano. Viron Bezhani deklaroi se mes radhëve të sigurimsave ka edhe politikanë, madje ata vijojnë të merren edhe sot e kësaj dite në Parlament. “Sigurisht që ka pasur politikanë që kanë qenë bashkëpunëtorë të Sigurimit të Shtetit, si s’ka pasur. Dosjet e reja janë bërë 100 herë më të mëdha se të vjetrit.
Normalisht është e vërtetë që ka pasur spiunë, por problemi është që tani janë bërë dosjet 100 herë më të forta se ato që kanë qenë. Pra nëse ka pasur një person që ka futur një njeri në burg, tani ata kanë vrarë dhe dosjet e reja janë shumë herë më të forta se dosjet e vjetra. Por ka një gjë që secila dosje do kohën e vet për tu hapur. Unë them që asnjë prej atyre që kanë qenë bashkëpunëtorë të Sigurimit të Shtetit nuk duhet të drejtojnë politikën. Nuk është normale që ti që ke spiunuar të merresh dhe të drejtosh sot politikën”, tha ai. Pra, përveç Bujar Sheshit, ka edhe shumë emra të tjerë të njohur që kanë qenë sigurimsa, duke thelluar kështu skandalin me dosjet e Sigurimit. Më tej, Bezhani zbuloi se shumë dosje janë asgjësuar.
“Dosjet kanë qenë të asgjësuara, por problemi është që dosja edhe mund të rikrijohet. Mjafton të kesh germën dhe pastaj gjendet përmes atyre problematikave që ka patur personi. Për shembull, një person mund të ketë bërë diçka dhe i gjendet germa dhe aty pastaj fillon e krijohet dosja. Nuk diskutohet që dosjet e asgjësuara i përkasin emrave të njohur të politikës”, deklaroi Viron Bezhani.
Asgjësimi i dosjeve për Berishën
Për asgjësimin e dosjeve të Sigurimit të Shtetit për emra të njohur, si Viron Bezhani, mendon edhe ish-kryetari i Shërbimit Informativ Shtetëror, Fatos Klosi. Madje Klosi zbardhi detaje mjaft interesante për gazetën “SOT” në lidhje me këtë çështje, duke theksuar se një nga emrat për të cilin nuk janë gjetur dosje është Sali Berisha. Sipas tij, ka dëshmitarë që thonë se për Berishën ka pasur dosje sepse ka qenë i ndjekur si bashkëpunëtor i Shërbimit Jugosllav, por diçka e tillë nuk gjendet.
“Di që ka dosje të asgjësuara me procesverbale, sipas të gjitha rregullave. Prandaj asnjëri nuk u akuzua se kishte zhdukur. Unë nuk gjeta shumë dosje të cilat gjatë periudhave të mëparshme ishin asgjësuar, të figurave të rëndësishme, por janë vetëm llafe. Unë nuk kam gjetur gjë. Me dëshmi gojore, që unë asnjëherë s’i kam mbajtur shënim sepse nuk i quaja të rëndësishme për të mbajtur shënim, më kanë thënë që pse s’e shikoni dosjen e filanit? Ore nuk është. Kryesisht për Sali Berishën, kjo ka qenë ideja. Thoshin që Sali Berisha ka pasur dosje sepse ai është ndjekur si bashkëpunëtor i Shërbimi Jugosllav. Ore,- ju thoja, nuk ka gjë në arkivat e Shërbimit sepse nuk mund ta kishim lënë pa e parë po të ishte”, tha Fatos Klosi.
Ai shtoi se shumë emra kanë futur duart në arkiva për të shkatërruar dosjet e Sigurimit. “Që nga krijimi e derisa e mora unë drejtimin e SHIK-ut në ’97, kishin kaluar mbi 5 vjet dhe aty kishin pasur të drejtë të fusnin duart kush të donte, ata që kishin të drejtë”, u shpreh ish-kreu i SHISH.
Mimoza Ibra
