Ministrja e Drejtësisë, Etilda Gjonaj, ka reaguar pas deklaratave të forta të kryetares së LSI, Monika Kryemadhi, një ditë më parë në Kuvend, ku tha se nuk e ka sulmuar ministren, për shkak të lidhjeve që kjo e fundit ka me Presidentin Ilir Meta.
Në një intervistë në ‘RTSH’, ministrja Gjonaj nuk ka pranuar të thotë çfarë lidhjeje ka me Kreun e Shtetit, por ka deklaruar se lidhja farefisnore nuk ka ndikuar asnjëherë në vendimet e saj. Ajo deklaroi se ka një komunikim zyrtar me Presdentin Meta, ndërsa shtoi se ai e ka mbështetur kur ishte në KLD me propozimet për ndëshkimin e gjyqtarëve.
“Është e tepërt dhe fare e vogël ëpr t’u diskutuar lidhjet farefisnore që mund të kem unë me Metën. Shqipëria është e vogël. Ajo që unë vlerësoj të rëndësishme përtej lidhjeve, është secili nga ne bëjmë detyrën për t’u shërbyer qytetarëve dhe jo lidhjeve farefisnore.
Edhe me Metën nuk kam ndonjë komunikim, përtej atij zyrtar, ndërsa e vlerësoj për faktin se më ka mbështetur kur isha anëtare e KLD dhe propozoja masa për gjyqtarët dhe ai më mbështeste. Kemi komunikim vetëm për pjesën e bashkëpunimit. Kryemadhi nuk duhet të më respektojë dhe as të më fyejë mua apo familjarët e mi për shkak të lidhjeve që kam me Metën”, ka thënë Gjonaj.
