Opozita po përgatitet për të sulmuar Kryeministrinë dhe institucionet e tjera në vend gjatë protestës së 16 shkurtit. Thirrjet e bëra nga Basha, Berisha e Kryemadhi për revolucion nuk kanë qenë flluskë sapuni, pasi në prapavijë po punohet për të destabilizuar vendin.
Teksa reforma në drejtësi po ecën dhe SPAK po afron, ditët e fundit autoritetet ligjzbatuese kanë marrë sinjale se më 16 shkurt po synohet të shkohet drejt dhunës. Gazeta e ka thënë se PD-LSI prej kohësh ishin duke punuar për të rrëzuar Ramën, duke nxitur përçarje në PS dhe duke shtyrë qytetarët drejt revoltave.
Por teksa na ndajnë dhe 3 ditë nga protesta, policia e shtetit dhe Shërbimi Informativ kanë marrë informacione se PD dhe LSI kanë pajtuar persona me rekorde kriminale që të shtyjnë turmën drejt dhunës më 16 shkurt.
Bëhet fjalë për një grup të fortësh, të cilët do të jenë në ballë të protestës, për t’u përplasur me forcat e rendit dhe për të sulmuar dhe rrethuar Kryeministrinë. Kjo ka bërë që dje të reagojë dhe Policia e Shteti, e cila ka kërkuar nga opozita që të tërhiqet nga skenarët e dhunës.
“Policia e Shtetit u bën apel forcave politike të angazhuara për tubimin e datës 16 shkurt që të shmangin retorikat, të cilat nxisin veprime kundër rendit e qetësisë publike. Po ashtu Policia e Shtetit ndan me publikun shqetësimin për përfshirjen në atë tubim të individëve me precedentë penalë apo të nxitur nga aktorë të tretë, të cilët synojnë krijimin e një klime destabiliteti në Shqipëri”, njoftoi policia.
Uniformat blu dhe SHISH janë informuar se në tubim mund të ketë dhe mjete të forta apo të ftohta e për këtë arsye më 16 shkurt në akset kryesore të vendit do të ketë kontrolle të imtësishme. Po ashtu, kushdo që është përfshirë më parë në vepra kriminale dhe do dalë të protestojë, do të ndalohet.
“Duke garantuar të drejtën e tubimit dhe lirinë e shprehjes së qytetarëve që manifestojnë për pikëpamjet e tyre politike, Policia e Shtetit u bën thirrje të gjithë qytetarëve që s’kanë lidhje me këtë tubim, të marrin masa për kufizimin e lëvizjes së tyre gjatë datës 16 shkurt në mjediset ku do të zhvillohet protesta.
Policia e Shtetit informon gjithashtu se do të kryejë kontrolle intensive të mjeteve në disa akse kryesore me qëllim që të parandalojë përfshirjen e personave me rekorde dhe precedentë kriminalë në protestën e datës 16 shkurt në interes të sigurisë së pjesëmarrësve të saj dhe të qytetarëve të tjerë”, njoftoi policia.
Skenarët
Më 21 janar nisi sesioni i ri parlamentar dhe atë ditë Berisha, Basha e Kryemadhi ishin në një zë, duke bërë thirrje për revolta me qëllim rrëzimin e qeverisë. Kreu demokrat ka nisur një tur takimesh dhe ka qenë disi më i butë, duke deklaruar se përmes protestave do nxitet Rama që të largohet.
Por Berisha e Kryemadhi kanë qenë tepër agresivë. Ish-kryeministri paralajmëroi skenar si në Venezuelë, ndër Kryemadhi ka kërcënuar disa herë Ramën se do të ketë fundin e diktatorëve. Por çfarë realisht do ndodhë më 16 shkurt.
Opozita po mban sekret skenarin e plotë, megjithatë ditët e fundit zyrtarë të saj kanë lënë të hapur mundësinë e trazirave. Deputeti i LSI Endrit Braimllari tha në një studio televizive se do rrethohet Kryeministria.
“Do të rrethojmë Kryeministrinë deri në largimin e Ramës”, tha ai. Ndërsa Sekretari i Përgjithshëm i PD, Gazmend Bardhi tha se do u lihet në dorë qytetarve të veprojnë si duan. Por gazeta ka mësuar se po futen persona të fortë dhe me rekord kriminale, për të nxitur dhe shtyrë turmën drejt përplasjeve.
Madje, këtë herë nuk do të ketë fjalime, por vetëm do të protestohet, ndërsa do të hidhen sende, vezë e flakadanë ndaj Kryeministrisë. Frika e autoriteteve është se të inkriminuarit do të provokojnë forcat e rendit me qëllim që të ketë përplasje. Megjithatë, SHISH dhe shërbimet informative në polici janë duke punuar për të shmangur çdo lloj dhune.
