Opozita ka paralajmëruar ditën e nesërme protestën e radhës para parlamentit. Ndërkohë, kryetari i Kuvendit, Gramoz Ruçi e anuloi seancën për shkak të informacioneve se protestuesit mund të futeshin me dhunë në sallë.
Nga ana tjetër, Policia e Shtetit ka bërë një deklaratë lidhur me protestën e nesërme të opozitës ku njofton se nga informacionet e mbledhura nga shërbimet përkatëse, ka të dhëna për nxitje të dhunës dhe organizime me natyrë kriminale që synojnë hyrjen me forcë në sallën e Parlamentit duke ushtruar dhunë mbi personelin që ka detyrimin ligjor të sigurojë mbrojtjen e institucionit themelor të demokracisë.
Për këtë, janë marrë masa të rrepta sigurie. Mësohet se një brez me tela me gjemba është vendosur në të gjithë perimetrin e sallës së parlamentit. Ky tel me gjemba do të përdoret nëse do të ketë tentativë të protestuesve për të thyer kordonin e policisë.
I gjithë perimetri i parlamentit do të rrethohet gjithashtu nga një kordon me policë. Nesër do të jenë 2 mijë forca të policisë në protestë, një numër më i lartë efektivësh se ai i tubimit të 16 shkurtit.
