Bashkimi Europian ka lënë në baltë opozitën sa i takon “luftës” së saj me qeverinë. Pas djegies së mandateve, shpresat e Partisë Demokratike dhe Lëvizjes Socialiste për Integrim janë që të ndërhyjnë ndërkombëtarët dhe të bindin kryeministrin të shkohet te dialogu politik, me qëllim shkuarjen te zgjedhjet e parakohshme. Ditët e fundit, madje është trumbetuar se në Tiranë do të vijnë një grup eurodeputetësh për të ulur në tryezë palët.
Por Parlamenti Europian duket se i ka prerë shpresat opozitës, pasi ka treguar se qëllimi i vërtetë i vizitës së tyre do të jetë monitorimi i reformave dhe bojkoti i opozitës. Sipas një njoftimi, Parlamenti Europian ka bërë të ditur se në datën 27 do të vijë një delegacion i kryesuar nga Tunne Kelam, ku pjesë do jetë dhe Knut Fleckenstein. Në njoftim thuhet gjithashtu se do të bëhet vlerësim për zbatimin e reformave në Shqipëri dhe Maqedoninë e Veriut, për hapjen e negociatave me BE.
“Një delegacion i eurodeputetëve do të shkojë në Tiranë dhe Shkup për të vlerësuar reformat drejt BE-së dhe gatishmërinë e vendeve për bisedimet e mundshme të pranimit. Anëtarët e Komitetit të PE për Punë të Jashtme do të vlerësojnë progresin e bërë në Shqipëri dhe Maqedoninë e Veriut lidhur me zbatimin e reformave të nevojshme për të hyrë në BE, ndërkohë që ka mbetur më pak se katër muaj për të vlerësuar gatishmërinë e tyre për të hapur negociatat e pranimit në BE”, thuhet në deklaratën e PE. Ata do të zhvillojnë takime dhe me opozitën, por nuk do tentojnë në asnjë moment për të ulur në tryezë palët, ashtu siç ndodhi në 2017.
Deri më tani si SHBA, ashtu dhe BE e kanë bërë të qartë se nuk ndërhyjnë më në punët e brendshme dhe tani PD me LSI kanë mbetur vetëm, pasi dhe Partitë Popullore janë kundër.
Projektet e financuara nga BE
Gjatë vizitës që eurodeputetët do të zhvillojnë në Shqipëri do të kryejnë vizita për të parë nga afër projektet e financuara nga Bashkimi Europian, para anëtarësimit të vendit drejt familjes europiane. “Vizita e ardhshme do të përqendrohet në çështjet e theksuara në rezolutat e PE mbi Ballkanin Perëndimor të miratuara në nëntor 2018, së bashku me zhvillimet aktuale në Shqipëri dhe zbatimin e Marrëveshjes së Prespës në Maqedoninë e Veriut. Anëtarët gjithashtu do të vizitojnë një projekt të financuar nga BE për të parë se si funksionojnë në praktikë financimet e veprave përpara anëtarësimit”, thuhet në njoftimin e Parlamentit Europian.
Gjithashtu pritet që eurodeputetët të takohen edhe me zyrtarët e opozitës. Gjatë takimit të tyre do të diskutohet edhe për djegien e mandateve dhe për bojkotin parlamentar, por kjo çështje pritet që të jetë në plan të dytë.
Reagon Tunne Kelam
Para ardhjes së eurodeputetëve të Bashkimit Europian, ka reaguar kreu i delegacionit Tunne Kelam, i cili u ka bërë thirrje palëve politike të punojnë së bashku për zbatimin e reformave, duke shtuar se nuk ka shumë koha deri në qershor, ku do merret vendimi për hapjen e negociatave. “2019 është një vit thelbësor që do të formësohet e ardhmja afatgjatë e Shqipërisë dhe Maqedonisë së Veriut.
Ne e mirëpresim progresin e bërë deri më tani dhe i nxisim fuqishëm të gjitha forcat politike që të punojnë së bashku për të zbatuar reformat e nevojshme pa vonesë. Nuk ka kohë për të humbur përpara mbledhjes së qershorit të Këshillit në Bruksel, ku do të merren vendime për gatishmërinë e vendeve për të hapur negociatat e pranimit”, u shpreh kryesuesi i delegacionit të PE-së Tunne Kelam. Duke iu referuar situatës politike në vend, ai tha se duhet një dialog konstruktiv mes qeverisë dhe opozitës, në mënyrë që të ketë një situatë më të qetë.
Kelam i ka bërë gjithashtu thirrje edhe opozitës që të heqë dorë nga djegia e mandateve dhe të rikthehet në Parlament. “Ne dënojmë me forcë të gjithë retorikën politike që nxit dhunën dhe i bëjmë thirrje opozitës që të rifutet në procesin demokratik Parlamentar. Qeveria dhe opozita duhet urgjentisht të qetësojnë situatën përmes angazhimit konstruktiv”, tha ai. /Elisjeda Kiko
