Sali Berisha gjatë intervistës së djeshme nuk kurseu as akuzat dhe kërcënimet ndaj kryeministrit Edi Rama. Sipas tij, Rama është një kufomë politike. Duke iu referuar protestave të opozitës dhe sulmeve me gaz lotsjellës nga ana e policisë, Berisha paralajmëroi kreun e qeverisë se do t’i paguajë lotët e derdhur për shkak të gazit. “Ai është një zhgarravitës dhe mënyrë absolute asgjë tjetër.
Janë të pavdekshme cilësimet që i kanë bërë kritikët e artit italianë, që thanë zhgarravinat e një adulti të droguar. Kaq janë ato. Problemi i tij është ky; ai është kufomë politike e pa kallur. A do ta kuptojë ai, kjo është gjë tjetër. Sa të jetë në fazë maniakale, ai nuk ka vesh që të dëgjojë, nuk ka sy që të dëgjojë. Ai do ti paguajë ato lot që u derdhën për shkak të gazit.
Policia e ka në rregullore kur përdor gaz-lotsjellës, por ai gaz përdoret për grupet terroriste. Unë mendoj dhe e paralajmëroj Edvinin, të ketë kujdes se populli i ka të gjitha mundësitë dhe aftësisë për të reaguar në të gjitha mënyrat”, tha Berisha.
Sulmeve të Sali Berishës nuk i shpëtoi as reforma në drejtësi. Sikurse herët e tjera, edhe dje ish-kryeministri u shpreh se zgjedhja e Ardian Dvoranit në krye të Këshillit të Emërimeve në Drejtësi është e paligjshme sepse ai duhet të ishte shkarkuar për shkak të problemeve me pasurinë.
Ndërsa për Këshillin e Lartë të Prokurorisë, Berisha deklaroi se në krye të tij është zgjedhur kunati i Mimi Kodhelit, çka e për të e bën këtë organ të kapur politikisht. Sulmet Berisha nuk i kurseu as për komisionerët e Komisionit të Pavarur të Kualifikimit.
Sa i takon djegies së mandateve, ish-kryeministri pranoi se ka qenë ai që ka dhënë idenë në tavolinën e PD dhe më pas kjo ide është dëgjuar dhe zbatuar nga anëtarët e partisë.
