Shtohen zërat se pas protestës së opozitës fshihet Moska. Gazeta “SOT” e deklaroi e para një gjë të tillë, ndërsa jehona ka kaluar edhe përtej detit. Kryeministri Edi Rama të martën në mbrëmje dhe dje ka qenë në Itali, ndërsa ka dhënë disa intervista në mediat vendase. Por Rama është pyetur mbi rolin rus në atë se çfarë po ndodh në Tiranë. Shefi i qeverisë ka thënë se ka të dhëna se Moska po ndjek me shumë interes këto zhvillime në vendin tonë, duke konfirmuar edhe një njëherë atë që gazeta e ka deklaruar prej ditësh.
“Ne nuk kemi fakte konkrete, por shumë të dhëna: Televizioni rus ka transmetuar drejtpërsëdrejti protestat, por nuk ka asgjë për t’u befasuar. Moska ndjek interesat e saj dhe Shqipëria brenda Bashkimit Europian nuk ndodhet në mesin e tyre”, deklaroi ai. Më tej, i pyetur së nëse Rusia është e interesuar që në Shqipëri të ketë destabilitet, në një kohë kur opozita ka nisur protestat, i pari i qeverisë theksoi se një gjë e tillë është evidente.
Madje, Rama nuk ngurroi që ta quajë Moskën si një dorë që përpiqet medoemos që ta ndezë sa më shumë fitilin zjarrit, duke destabilizuar Shqipërinë, pasi kjo e fundit është proeuropiane. “Para së gjithash, po thosha pak më parë, bëhet fjalë për “revoltë në pallat”, unë nuk flas kurrë në gjuhë të huaj për kundërshtarët e mi edhe pse italishtja nuk është plotësisht një gjuhë e huaj për mua, nuk bëhet fjalë për një revoltë në shesh apo të popullit, por për një revoltë jashtëzakonisht e pazakonshme, një lloj Aventini shqiptar që për më tepër ndodhi, dhe, nga ana tjetër, pyetja juaj është shumë tendencioze.
Unë nuk dua të hamendësoj për gjëra për të cilat nuk kemi fakte. Është e qartë, jo të gjithë e duan Shqipërinë në Europë dhe nuk është një sekret që Rusia nuk e pëlqen Europën e madhe. Dhe kur janë të tilla situata, ata me kënaqësi mund të japin një dorë dhe kjo gjë nuk do të ishte aspak një surprizë”, u shpreh ai.
Konflikti Shqipëri-Iran
Kryeministri Edi Rama ka komentuar edhe raportet e tensionuara mes Tiranës zyrtare dhe Teheranit zyrtar, duke u shprehur se ka një “luftë” të kësaj natyre. “Për pyetjen që më bëtë për Iranin, Shqipëria është vendi ku një pjesë shumë e rëndësishme e opozitës iraniane është mirëpritur për të shpëtuar jetët e tyre. Ne kemi një traditë, pasi Shqipëria ishte i vetmi vend ku hebrenjtë ishin më të shumë në numër pas luftës sesa përpara luftës dhe që nuk ka në regjistrin e saj të historisë asnjë hebre të dorëzuar te nazistët.
Ofruam këtë mikpritje për rreth 3 000 refugjatë iranianë që janë të opozitës. Jemi në një lloj konflikti me regjimin, u detyruam të dëbonim ambasadorin dhe një funksionar tjetër të lartë pasi ishin të përfshirë në aktivitete jo shumë dashamirëse në territorin tonë, por, për më tepër, unë dua të flas për fakte dhe jo për insinuata”, tha ai.
Raportet me Italinë
Duke komentuar raportet mes Shqipërisë dhe Italisë, shefi i qeverisë deklaroi se marrëdhëniet mes dy vendeve janë të shkëlqyera dhe se italianët janë të prirur të investojnë në Shqipëri. “Ajo ka qenë gjithmonë pozitive, nuk ka qene kurrë e kushtëzuar nga ngjyrat e qeverive.
Italia ka qenë gjithmonë pranë për të na mbështetur sa here kemi patur nevojë. Por thuhet se angazhimi i Italisë nuk është i mjaftueshëm në vend, që nënkupton se nuk ka lindur asnjëherë një marrëdhënie pozitive biznesi. Madje, italianët janë të parët që investojnë në vendin tonë. Por e dini se çfarë thonë ata në Tiranë? Që në Shqipëri nuk ka asnjëherë një Itali të mjaftueshme”, nënvizoi kryeministri Edi Rama.
Rigels Seliman
