Ndërkombëtarët kanë lënë në baltë opozitën shqiptare. Prej disa javësh, opozita ka dalë në rrugë duke protestuar kundër qeverisë, ndërsa në shenjë revolte vendosi dhe të digjte mandatet e deputetëve, me shpresën se këto qëndrime radikale do të mbështeteshin fuqishëm nga ndërkombëtarët. Por duket nuk ka ndodhur aspak kështu, pasi njëzëri përfaqësues të Shteteve të Bashkuara të Amerikës dhe Bashkimit Europian kanë dalë kundër Partisë Demokratike dhe Lëvizjes Socialiste për Integrim.
Gjatë ditëve të fundit në Tiranë kanë mbërritur një sërë zyrtarësh të lartë të BE-së, përfshi këtu eurodeputetët, vizita e së cilëve ka pasur në fokus zgjidhjen e situatës politike në të cilën ndodhet vendi jonë. Por pas takimeve që kanë patur me zyrtarë të mazhorancës dhe opozitës, zyrtarët europianë duket se nuk kanë dalë të kënaqur, duke theksuar se kjo gjendje dhe mbi të gjitha përplasjet e vazhdueshme politike në Shqipëri i kanë lodhur tej mase ata.
Madje, këtë e faktojnë fare mirë edhe thirrjet e vazhdueshme të tyre duke i kërkuar opozitës dhe mazhorancës që të ulen në tryezën e dialogut, por që vetë janë distancuar dhe nuk kanë pranuar që të jenë kumbarë të “pajtimit” të madh politik.
E njëjta krizë politike përfshiu Shqipërinë edhe në pranverën e vitit 2017, teksa u desh ndërhyrja e ndërkombëtarëve, konkretisht kryetarit të Komitetit për Punë të Jashtme në Parlamentin Evropian, David McAllister dhe zyrtarit të DASH, Brian Hoyt Yee që t’i ulnin palët në dialog dhe t’i jepnin zgjidhje krizës.
Por së fundmi ndërkombëtarët, pavarësisht vizitave që kanë zhvilluar në Tiranë, kanë rrëzuar çdo aludim se ata do të ulin tonet dhe do të sheshojnë krizën politike që ka përfshirë vendin. Madje, ata janë shprehur qartë kur kanë theksuar se nuk ndërhyjmë më për të pajtuar mazhorancën me opozitën, por sipas tyre, këto dy kampe duhet ta zgjidhin vetë konfliktin.
Pra, kjo tregon qartë që ndërkombëtarët janë shumë të zhgënjyer nga politikanët tanë, sidomos ata të opozitës. Mirëpo, kjo e fundit për të fituar zemrat e ndërkombëtarëve kanë nisur një fushatë në mediat e huaja, duke paguar artikuj të ndryshëm, me qëllim nxirjen e imazhit të qeverisë, që zyrtarët e SHBA dhe BE të mbështesin opozitën. Por edhe kjo gjë nuk ka funksionuar.
Megjithatë, gazeta mësoi se asin nën mëngë që do të përdorë opozita për të bërë ndërkombëtarët kundër mazhorancës, janë Partitë Popullore Europiane, nëse këto të fundit do të dominojnë në zgjedhjet e Parlamentit Europian që mbahen në fillim të muajit qershor.
