Kryeministri Edi Rama ka replikuar me komentuesit në faqen e tij në Facebook pas deklaratës për konfliktin te ‘Petro Nini’. Njëri prej ndjekësve ka kërkuar nga Rama që qeveria të hetojë gjyqtarët dhe të sekuestrojë pasuritë e pa justifikuara. Ndërkohë që e fortë ka qenë përgjigja e kryeministrit. “Më fal ti ku jeton, ne hene apo ne Shqiperi?!
Ta bej kete pyetje sepse nderkohe ne Shqiperi po ndodh hetimi i pasurive te gjykatesve dhe jane bere mbi 60 qe jane sikterisur nga sistemi per shkak te pasurise se pajustifikuar! Ndersa qeveria qe ta marresh vesh ti, nuk heton gjykates dhe nuk sekuestron pasurite e gjykatesve, sepse nuk jetojme ne komunizem sikunder edhe ta kam shpjeguar, sepse kete teme e kemi mbyllur ne vitin 1991”.
Një tjetër qytetar shprehet se i është sosur durimi, ndërsa Rama përgjigjet duke thënë se do të vijojë që të punojë që të bëjë shtet. “T’u sos durimi ty? Epo bej si te besh vella, se mua s’me soset durimi sepse e di mire se c’do te thote te besh shtet duke luftuar jo vetem me te shkuaren, po edhe me mendesine e hatashme qe shteti duhet per tjetrin, por jo per veten”.
