Sot, Opozita përreth katër orë protestoi përpara Kryeministrisë dhe Parlamentit. Një protestë kjo e paralajmëruar e cila sipas Lulzim Bashës në qëndrimin e tij të disa ditëve më parë, do të ishte fundi i Edi Ramës dhe do të rrëzohej kryeministri. Sot ishte finalja dhe fitorja e paralajmeruar.
Të njëjtën gjë Lulzim Basha tha edhe para një muaji. Kujtojmë, se me 16 shkurt 2019, pasi përfundoi protesta, Basha tha se “Rama kishte rënë”.
Pasi zhvilloi dhe tre protesta të tjera para Parlamentit, ai njoftoi se do të mblidhen me 16 Mars, që të rrëzojmë përfundimisht Edi Ramën.
Sot mijëra demokrat dhe qytetarë u mblodhën në protestë, dolën në bulevardin “Dëshmorët e Kombit” dhe Lulzim Basha foli vetëm në fund të protestës. Gjatë protestës, foli tre herë vetem Flamur Noka, i cili u duk se ishte lideri i ri i saj.
Luli i mori protestuesit dhe i vërtiti tre herë rreth kryeministrisë, i çoi tek Parlamenti, i përplasi me Policinë, i la në mes gazit lotsjellës dhe më pas Lulzim Basha shkoi tek selia e PD -së dhe mbajti një fjalim përmbyllës, duke thënë e ky ishte zgjimi i dytë.
Në shkurt na tha se ra “Rama ka rënë”, disa ditë më parë tha se do të mblidhemi të shtunën, me datë 16 Mars që t’i japim goditjen finale Edi Ramës, por sot e mbylli me dy zgjime, disa verdallosje dhe asgjë më shumë kaq.
Rama nuk ka rënë, është akoma në kryeministri dhe Luli iku. Dikush mund të pyesë: Çfarë mund të bënte më shumë?
Ndoshta asgjë s’mund të bënte më shumë, apo ajo që po bën është maksimumi i tij dhe mbase po bën gjithçka ai ka në dorë.
Por, nuk mund të gënjesh, t’i tradhëtosh dhe të tallesh me demokratët, duke iu thënë në çdo protestë, “hajdeni se e rrëzuam, hajdeni se e rrëzuam.” Apo, t’i sjellësh protestuesit vërdallë, tre herë rreth kryeministrisë dhe pastaj t’u thuassh ‘ikni në shpi se Rama ka rënë”.
Kjo është qesharake, skandaloze dhe e turpshme aq sa Luli po i debon vete protestuesit duke u bere keshtu dhe avokat i Rames.
Në rast se Lulzim Basha ka një qëllim në vetvete, pra nuk kërkon asgjë më shumë se sa të forcojë pozitat e tij në Partinë Demokratike, pra të formësohet si lideri i saj, kjo është diçka tjetër.
Por, nuk mund të përdoren as demokratët, as qytetarët, të cilët thirren në protesta për të rrëzuar Edi Ramën dhe pastaj protesta të braktiset apo t’iu thuhet se po u mblodhët shumë “Rama ka rënë” dhe pastaj t’ua interpretosh këtë sikur ata janë zgjuar nga gjumi dhe të tallesh në mënyrë qesharake.
Në fakt Luli nuk mund të bënte më shumë, as për t’u bërë lider, as për t’u bërë çdo gjë tjetër. Mesa duket qëllimi i tij i vetëm nuk është rrëzimi i Ramës, por që të ketë në zotërim Partinë Demokratike dhe të legalizohet si kryetar i saj.
Vulën e ka, askush nuk do t’ja marrë. Por sërish Luli nuk ka hall të rrëzojë Ramën, por të mbajë partinë.
Do të ishte më mirë, t’i kishte bërë një letër publike drejtuar Berishës që ta legalizonte si kryetar, sesa të tallet kështu me njerëzit, duke i nxjerrë në protesta me gënjeshtrën se “Rama ka rënë” apo “Rama do marrë goditjen finale” dhe të thotë turpesisht se këto ishin thjesht ëndërra dhe zgjimi i populli nga gjumi./CNA.al
